दैनिक उपभोग्य वस्तुकाे चर्काे मूल्यवृद्धिप्रति सरकारको ध्यानाकर्षण

काठमाडाैं, साउन २० : राष्ट्रियसभाका सांसद खिमलाल भट्टराईले दैनिक उपभोग्य वस्तुमा मूल्यवृद्धि भए पनि त्यसतर्फ सरकारको ध्यान जान नसकेको बताएका छन्।

राष्ट्रियसभाको बुधबारको बैठकको विशेष समयमा उनले एक वर्षमा एक सय १७ प्रतिशतसम्म मूल्य वृद्धि हुँदा पनि सरकारको ध्यान जान नसकेको बताए। तेलको मूल्य घटबढ हुँदा सामान्यतः समायोजन गर्ने चलन रहे पनि त्यसो नगर्दा मूल्यवृद्धि नियन्त्रण हुन नसकेको उनको भनाइ छ।

उनले जनताले उपभोग गर्ने खाद्यान्नमा मूल्यवृद्धिले ढाड सेकिएको र जनतामा गरिबी बढ्दा विभिन्न आपराधिक गतिविधि बढेकोतर्फ पनि सरकारको ध्यानाकर्षण गराए। त्यस्तै उनले आगामी चुनाव र त्यसको तयारी धाँधलीरहित बनाउन आग्रह गरे। उहाले गठबन्धनको ध्यान सत्ता जोगाउन मात्र केन्द्रित भएको आरोप लगाए।

त्यस्तै सांसद प्रकाश पन्थले प्रधानमन्त्री शेरबहादुर देउवा नेतृत्वको सरकारले निर्वाचन लगायतका महत्वपूर्ण कामहरु सम्पन्न गरेको बताए। राजनीति र व्यवस्थामा स्थिरता भयो भने शान्ति सुव्यवस्था र विकास हुनेतर्फ ध्यान दिँदै त्यहीअनुसार अघि बढ्नुपर्ने अहिलको आवश्यकता रहेको उनको भनाइ छ।

त्यस्तै सांसद जितेन्द्रनारायण देवले सरकारले युगान्तकारी कामहरु गरेको स्मरण गर्दै प्रतिपक्षी दल रचनात्मक हुनुपर्नेमा नकारात्मकवादको सिकार भइरहेको बताए। उनले नयाँ ढंगको राजनीतिक संस्कारको जरुरी रहेको पनि बताए।

सांसद सुरेश आलेमगरले जनताको माग र पहिचानका आधारमा प्रदेश १ को नामकरण गर्न माग गरे।

बैठकमा कानूनमन्त्री गोविन्दप्रसाद शर्मा कोइरालाले मन्त्रिपरिषद्को निर्णयबाट जारी भएको बेपत्ता पारिएका व्यक्तिको छानबिन, सत्य निरूपण तथा मेलमिलाप आयोग ऐन २०७१ को दफा ४२ बमोजिमको बाधा अड्काउ फुकाऊ आदेश सभा समक्ष पेस गरेका थिए। राष्ट्रियसभाको अर्को बैठक भदौ ६ गते बोलाइएको छ।