‘जबरालाई दोषी करार गरी पदमुक्त गर्न महाभियोग कि अभीष्ट पूरा गर्न ?’

काठमाडौं, साउन २२ : नेपाल कम्युनिस्ट पार्टी (एमाले) का सांसद तथा पूर्वमन्त्री खगराज अधिकारीले चोलेन्द्र शमसेर जबराविरुद्ध संसदमा दर्ता भएको महाभियोगको उद्धेश्यबारे प्रश्न गरेका छन् ।
 
प्रतिनिधि सभामा आइतबारदेखि सुरु भएको महाभियोगबारेको छलफलमा बोल्दै सांसद अधिकारीले संसदमा दर्ता भएको पाँच महिनापछि मात्रै महाभियोगबारे छलफल गरिनुले गम्भीर प्रश्न उठाएको बताएका हुन् ।
 
उनले प्रमुख प्रतिपक्षी दलले लगातार महाभियोगबारे छलफल गर्न माग गरेपनि सुनुवाई नभएको बताए । महाभियोग दर्ता भएको तीन महिनाभित्र छिनोफानो भइसक्नुपर्नेमा निर्वाचनको मिति घोषणा भइसकेको अवस्थामा मात्र छलफल सुरु गरिनुले सरकार र संसदमाथि गम्भीर प्रश्न उठेको बताए  ।

उनले अभियुक्त हो भन्न नसकेर सरकारले विना प्रमाणका आधारमा अभियोजन गरिएको हुनसक्ने शंका समेत व्यक्त गरे । ‘दोषी करार गरेर मुक्त गर्न खोजेका हौं कि अभिष्ट पूरा गर्न दर्ता गरेका हौं, प्रश्न चिह्न खडा भएको छ,’ उनले भने । 

सांसद अधिकारीले अगाडि भने, ‘यस्तो अपरिपक्वता संसदले व्यहोर्नु हुँदैन । समयमै सक्ने सामथ्र्य प्रतिनिधि सभामा छ । रित पुर्याए भनेर मात्रै काम गर्नु हाम्रो अयोग्यताको पराकाष्ठा हो । यस्तो नजिर नबसोस् ।’