साफ च्याम्पियनसिपमा भारतसँग भिड्दै नेपाल

काठमाडौं, साउन १५ : साफ यू-२० च्याम्पियनसिप फूटबल प्रतियोगितामा आज नेपाल र भारतको खेल हुँदै छ।

भारतको भुवनेश्वरस्थित कालिंगा रंगशालामा नेपालले घरेलु टोलीको सामना गर्नेछ। नेपाल र भारतको आज साँझ ७ बजे हुनेछ।

नेपाल तेस्रो जितका लागि मैदानमा उत्रिनेछ। यसअघिका दुई खेलमा नेपालले जित हासिल गर्दै ६ अंक जोडेको छ।

नेपालले पहिलो खेलमा माल्दिभ्सलाई ४-० गोल अन्तरले र दोस्रो खेलमा श्रीलंकालाई ३-० गोल अन्तरले हराएको थियो। भारतलाई हराएमा नेपालले फाइनल प्रवेश गर्नेछ।

अहिले तीन खेल जितेको बंगलादेश ९ अंकसहित शीर्षस्थानमा छ। भारतले दुई खेलमा तीन अंक जोडेको छ।

पाँच देश सहभागी प्रतियोगितामा मालदिभ्स र श्रीलंकाले अंक जोड्न सकेको छैन।