महराकाे थुनछेक बहस सकिएन, आज पनि हिरासतमै

काठमाडौं, कात्तिक १७ : संसद् सचिवालयकी कर्मचारी रोशनी शाहीमाथि यौन दुर्व्यवहार गरेको अभियोगमा थुनामा रहेका निवर्तमान सभामुख कृष्णबहादुर महराको थुनछेक बहस नसकिएका कारण सोमबार पनि जिल्ला अदालत, काठमाडौंमा जारी रहने भएको छ । महरा आइतबार पनि प्रहरी हिरासतमै रहने भएका हुन् ।

काठमाडौं जिल्ला अदालतका न्यायाधीश सुदर्शनराज पाण्डेको इजलासमा भएको थुनछेक बहसमा सबै कानून व्यवसायीको बहस नसकिएपछि उनकाे मुद्दा ‘हेर्दा हेर्दै’मा राखिएको छ । बहस सोमबार पनि जारी रहने गरी  इजलास स्थगित भएको हो ।

बन्द इजलासमा भएको बहसमा सरकारी पक्षबाट सह–न्यायाधिवक्ता चन्द्रकान्त खनाल, न्यायाधिवक्ता हरिप्रसाद रेग्मी, उमाकान्त पौडेल र सहायक न्यायाधिवक्ता सृजना ढकालले बहस गरे । महराका तर्फबाट पूर्वमहान्यायाधिवक्ता रमण श्रेष्ठ, नेपाल बार एसोसिएसनका पूर्वअध्यक्ष शेरबहादुर केसीले बहस गरे । अब महरातर्फबाट सबिता भण्डारी, कृष्णप्रसाद सापकोटा र लव मैनाली लगायतले बहस गर्नेछन् । महराका तर्फबाट बहस गर्न चाहने कानून व्यवसायीको सूची लामो रहेको बताइएको छ ।

थुनछेक बहस सोमबार सकिएमा महरा साधारण तारेखमा रिहा हुने, धरौटीमा रिहा हुने या पुर्पक्षका लागि जेल चलान हुने आदेश हुनेछ । महरा गत १९ असोजमा पक्राउ परेका थिए । उनीमाथिको थुनछेक बहस आइतबार सुरू भएको हो ।

प्रहरीले ८ कात्तिकमै अनुसन्धान प्रतिवेदन जिल्ला सरकारी वकिल कार्यालमा पेस गरे पनि तिहार बिदाका कारण महराको मुद्दा अदालतमा दर्ता गर्न ढिला भएको थियो । प्रहरीले २५ दिन थुनामा राखेर महरामाथिको अनुसन्धान गरेको थियो । 

प्रहरीको प्रतिवेदनका आधारमा सरकारी वकिलको कार्यालयले महरामाथि साढे ७ वर्ष जेल सजायसहित जबर्जस्ती करणी उद्योगमा मुद्दा दर्ता गरिसकेको छ ।