युवा संघ जुट्याे उपचुनावको प्रचारप्रसारमा

काठमाडौं, कात्तिक १७ः नेकपाको भगिनी संगठन राष्ट्रिय युवा संघ नेपालको केन्द्रीय कार्यालयको बैठकले मंसिर १४ गते हुने उपनिर्वाचनमा नेकपाका उम्मेदवारहरुलाई विजयी बनाउन अपील गरेको छ । 

उक्त संगठनले किरण पौडेलको नेतृत्वमा एक प्रचार÷प्रसार समिति पनि गठन गरेको जनाएको छ । समितिका सदस्यहरुमा प्रभात कटवाल, ज्ञानेन्द्र गुरुङ्, पुष्प ओली, रोशन बस्नेत, प्रकाश गौतम, नविन खड्का र प्रकाश लामिछाने रहेका छन् । 

संगठनको कात्तिक १६ गते बसेको कार्यालयको बैठकले उपनिर्वाचनका लागि सम्बन्धित जिल्लाले आवश्यक समन्वय गरी निर्वाचन परिचालन समिति बनाइने पनि निर्णय गरेको छ ।
युवासंघका सहइञ्चार्ज एवम् संयोजक रामप्रसाद सापकोटा ‘दीपशिखा’ र सहसंयोजक रमेश पौडेलले हस्ताक्षर गरी सार्वजनिक गरेको निर्णयअनुसार, संगठनका केन्द्रीय तहका नेताहरुलाई उपनिर्वाचनमा सक्रियतापूर्वक परिचालित हुन निर्देशन गरेको र परिचालित भएको केन्द्रीय कार्यालयमा जानकारी गराउनुपर्नेछ । 

आगामी डिसेम्बरमा साईप्रसमा हुने विश्व युवा संगठन (डब्लुएफडीवाई) को महासभामा भाग लिन संगठनका संयोजक रामप्रसाद सापकोटा ‘दीपशिखा’ को नेतृत्वमा सुमन देवकोटा, सन्तोष रावल र सुन्दर भुषाल जाने निर्णय पनि गरेको छ । संघले डब्लुएफडीवाईको उपाध्यक्षमा उम्मेदवारी दिने निर्णय भयो । 

एकता र संगठनबारे
युवा संघले संगठनका सबै तहहरुमा साविकको एक संगठनबाट संयोजक र सहइन्चार्ज हुँदा साविकको अर्को संगठनबाट सहसंयोजक र इन्चार्ज हुने नीतिगत निर्णय गरेको छ । साविकका दुवै संगठनको सहमतिका आधारमा कुनै तहका हकमा फरक निर्णय गर्न पनि सकिने छ । 

प्रदेश, जिल्ला, महानगर तथा उपमहानगरहरुमा इन्चार्ज तथा सहइन्चार्ज केन्द्रिय समितिका सदस्यहरु रहने निर्णय भएको छ । 

जिल्लाको संगठनात्मक नेतृत्वमा साविकको एक संगठनको नेतृत्व हुँदा महानगर तथा उपमहानगरमा साविकको अर्को संगठनबाट संगठनात्मक नेतृत्व हुने नितिगत निर्णय गरिएको छ । साथै दुई उपमहानगर भएका जिल्लाहरुमा एक–एक उपमहानगरमा साविकका संगठनहरुले संगठनात्मक नेतृत्व गर्नेछ । 

जिल्लाको संयोजक तथा सहसंयोजक १ हप्ताभित्र साविकका संगठनहरुले टुंग्याउने निर्णय गरिएको छ । साथै संयोजक, सहसंयोजक चयन गर्दा साविकका संगठनको बरिष्ठता र सक्रियताका आधारमा चयन गरिनेछ ।