छठ पर्व : आज खरना गरिँदै, के हो खरना?

जनकपुरधाम, कात्तिक १५ : आराध्यदेव सूर्यको उपासना गरी मनाइने छठअन्तर्गत आज दोस्रो दिन खरना गरिँदैछ। जीवनपद्धतिलाई प्रतिविम्बित गर्ने छठ पर्वको खरनालाई पापको क्षय हुने दिन भनिन्छ।

खरनाअन्तर्गत गाईको गोबरले लिपपोत गरिन्छ। अनि अरबा चामलको पीठोबाट तयार पारिएको झोलले भूमि सुशोभित गरिन्छ। र, व्रती दिनभर उपवास बस्ने गर्दछन्।

बेलुकीपख चन्द्र दर्शन गरिसकेपछि माटोको नयाँ चुह्लोमा र माटोकै नयाँ भाँडोमा सखर, दूध र गम्हरीको चामलको खीर पकाइन्छ। गम्हरी चामलको अभावमा धानको चामलको प्रयोग गरिन्छ। कतिपय परिवारमा खीरका साथै रोटी पनि पकाइन्छ।

खरनामा नैवेद्य चढाउने बेलामा जति वटा अर्घ्यदान गरिने हो, त्यति वटा स्थानमा केराको पातमाथि नैवेद्य चढाउने गरिन्छ।

यसरी चढाइने नैवेद्यमा खीर, दूध, केरा, मूला, पान र सुपारी आदि राखिन्छन्। नैवेद्यलाई केराको पातमा राखेर छठी मातालाई चढाइन्छ।

नैवेद्यलाई उत्सर्ग गरिसकेपछि व्रती र परिवारजनले प्रसाद ग्रहण गर्ने चलन रहेको छ।

आज मिथिला क्षेत्रमा स्थानीय बासिन्दा खरनाको तयारीमा जुटेका छन्।