समाजवादी–राजपाबीच छठपछि एकता गर्ने तयारीे, अध्यक्ष पदमा कुरा मिल्न बाँकी
काठमाडौं, कात्तिक ३ः मधेशमा जनाधार भएका दुई राजनीतिक दल– समाजवादी पार्टी र राष्ट्रिय जनता पार्टी (राजपा) बीचको पार्टी एकीकरणको तयारी अन्तिम चरणमा पुगे पनि नेतृत्....
काठमाडौं, कात्तिक ३ः मधेशमा जनाधार भएका दुई राजनीतिक दल– समाजवादी पार्टी र राष्ट्रिय जनता पार्टी (राजपा) बीचको पार्टी एकीकरणको तयारी अन्तिम चरणमा पुगे पनि नेतृत्वमा कुरा नमिल्दा अड्किएको छ ।
समाजवादी पार्टीका दुई जना अध्यक्ष रहेकाले राजपाले पनि एकीकरणपछि आफ्ना दुई जना अध्यक्ष हुनुपर्ने माग सारेको छ । समाजवादीका नेताहरू भने समाजवादीका दुई अध्यक्ष नै भारी भइसकेकाले राजपाबाट महन्थ ठाकुर एक जना मात्र अध्यक्ष थपेर तीन अध्यक्ष हुने गरी एकीकरण गर्न तयार छन् । तर, राजपा वार्ताटोली संयोजक ले राजेन्द्र महतोले आफू पनि अध्यक्ष हुनुपर्ने अडान राखेका छन् ।
दुई पार्टीबीच एकीकरण गर्ने सैद्धान्तिक सहमति यसअघि नै भइसकेको छ । तत्कालीन नयाँशक्ति, संघीय समाजवादी फोरम र राजपाबीच सैद्धान्तिक एकीकरण गर्ने सैद्धान्तिक सहमतिपछि नै नयाँशक्ति र फोरम एकीकृत भइसकेका छन् ।
नयाँशक्ति र फोरम एकीकृत हुँदा भारतीय चुनावको परिणाम हेरेर मात्र निर्णय गर्ने बताउने राजपा नेताहरू त्यहाँ कुनै परिवर्तन नभएपछि एकीकरण गर्न पहिलेभन्दा लचिलो भएको समाजवादीको मूल्याङ्कन छ ।
दुवै दलका नेताहरू एकीकरणको तयारी अन्तिम चरणमा पुगेको बताउँछन् । समाजवादीका एक नेताले दिएको जानकारीअनुसार, दुई पार्टीबीचको एकता वार्ता पहिलेभन्दा सकारात्मक रुपमा अघि बढेको छ । राजपाले समाजवादीका दुई अध्यक्ष रहेकोमा राजपाबाट पनि कम्तिमा महन्थ ठाकुर र राजेन्द्र महतो दुई जनालाई अध्यक्ष बनाउनुपर्ने अडान राखेको छ ।
नेतृत्वको कुरा मिलेमा एक महिनाभित्र एकता घोषणा गर्ने गरी तयारीमा राजपाका अध्यक्ष महन्थ ठाकुर र वार्ता टोली संयोजक राजेन्द्र महतो रहेका छन् । तर, राजपा अध्यक्ष मण्डलका बाँकी चार सदस्य भने यसको विपक्षमा छन् । त्यसबाहेक विषेशचन्द्र लाललगायत तमलोपाको एउटा ठूलै समूह पनि एकीकरणको विपक्षमा रहेको स्रोतको दाबी छ ।
राजपा नेताहरूले एकीकरणको पूर्वशर्तका रुपमा समाजवादी पार्टीले सरकार छाड्नुपर्ने अडान राखेको छ । समाजवादीले पनि तिहारलगत्तै केन्द्रीय समितिको बैठक डाकेको छ ।
उपप्रधानमन्त्री एवम् स्वास्थ्यमन्त्री उपेन्द्र यादव सकेसम्म सरकारमा बसिरहन चाहे पनि संविधान संशोधन अघि नबढेकाले उनलाई बसिरहन अप्ठेरो भएको छ । समाजवादीले सरकारमा बस्ने–नबस्ने टुंगो लगाउन र पार्टी एकताबारे छलफल गर्न छठलगत्तै केन्द्रीय समिति बैठक डाकिसकेको छ । समाजवादीका ती नेताले भने, ‘तिहारपछि बस्ने पार्टी केन्द्रीय समिति बैठकमा सरकार छाड्नेबारे बहस हुनेछ । संभवतः यो बैठकले सरकार छाड्ने निर्णय गर्ने छ ।’
