३५ हजार पदका लागि एक लाख ५२ हजार उम्मेदवार

काठमाडौं, वैशाख १५ : स्थानीय तह निर्वाचनका लागि विभिन्न दल तथा स्वतन्त्र गरी एक लाख ५२ हजार ४६५ जनाले उम्मेदवारी दिएका छन्।

निर्वाचन आयोगको प्रणालीमा गएरातिसम्म प्रविष्ट भएको विवरणअनुसार दलगत र स्वतन्त्रसहित गरी मेयरमा तीन हजार ४९४ जनाले उम्मेदवारी दिएका छन्। त्यस्तै, अध्यक्षमा तीन हजार ३८७ को मनोनयन परेको छ।

उपमेयरमा दुई हजार ५६ र उपाध्यक्षमा दुई हजार एक जनाले उम्मेदवारी दिएको आयोगले जनाएको छ। यसैगरी, वडाध्यक्षमा ३५ हजार २५६ र सदस्यमा ५५ हजार ४७१ जनाको उम्मेदवारी परेको छ।

आयोगको सूचना तथा प्रविधि शाखाका अनुसार छुटपुट भएका र विवरण सच्याइएका तथ्याङ्क प्रणालीमा प्रविष्ट हुने क्रम जारी रहेको छ। आयोगले वैशाख ११ र १२ गते उम्मेदवारी दर्ता गरेको थियो।

स्थानीय तहका ३५ हजार २२१ जनप्रतिनिधिका लागि वैशाख ३० गते मतदान हुनेछन्।