भरतपुर मेयरमा एमाले र उपमेयरमा राप्रपाले उम्मेदवारी दिने

चितवन, वैशाख १२ : चितवनको भरतपुर महानगरपालिकामा एमाले र राष्ट्रिय प्रजातन्त्र पार्टी (राप्रपा) बीच चुनावी तालमेल गर्ने सहमति भएको छ।

दुई दलबीच आज (सोमबार) भएको छलफलपछि तालमेल गर्ने सहमति गरेको हो। एमालेले मेयर र राप्रपाले उपमेयरमा उम्मेदवारी दिने र एकले अर्कालाई सघाउने सहमति भएको जनाइएको छ। 

भरतपुर मेयरमा एमालेबाट विजय सुवेदी उम्मेदवार बन्ने भएका छन्। राप्रपाले उपमेयर टुंग्याउन बाँकी छ। 

सहमतिअनुसार राप्रपाले महानगरका वडा १५ र २६ को वडाध्यक्ष पाउनेछ। वडा ४, ११, १६, १९ र २४ मा दुवै दलका वडाध्यक्ष उम्मेदवार रहने र मित्रवत् प्रतिस्पर्धा गर्ने जनाइएको छ।

बाँकी वडामा एमालेका वडाध्यक्षसहित राप्रपाबाट पनि सदस्य रहनेछन्।