चैत मसान्तसम्म सबै नागरिकलाई निःशुल्क कोभिड खोप दिइसक्न प्रधानमन्त्रीको निर्देशन

काठमाडौं, कात्तिक ११ : प्रधानमन्त्री शेरबहादुर देउवाको अध्यक्षतामा बिहीबार बिहान बालुवाटारमा कोभिड–१९ संकट व्यवस्थापन समन्वय केन्द्रको पहिलो बैठक बसेको छ ।

कोभिड संकट व्यवस्थापनसम्बन्धी अध्यादेश निश्क्रिय भएपछि सरकारले आदेश जारी गर्दै कोभिड–१९ संकट व्यवस्थापन समन्वय केन्द्र गठन गरेको थियो । बिहीबारको बैठकमा केन्द्र र स्वास्थ्य मन्त्रालयको तर्फबाट प्रस्तुतीकरण गरिएको थियो ।

हालसम्म कोभिड–१९ संकटको अवस्था कस्तो छ, चाडबाडको बीचमा कोरोना प्रसार कस्तो रह्यो, अन्तर्राष्ट्रिय र नेपालको ट्रेन्ड के छ भन्नेबारेमा बैठकमा प्रस्तुती दिइएको थियो । स्वास्थ्य मन्त्रालयले खोपको हालसम्मको कभरेज र उपलब्धताको अवस्थाबारे पनि बैठकमा ‘ब्रिफ’ गरेको थियो ।

कोभिड–१९ संकट व्यवस्थापन समन्वय केन्द्रमा जनशक्ति व्यवस्थापन र आवश्यक संरचनाबारे पनि बैठकमा छलफल भएको थियो । केन्द्रका संयोजक पूर्वरथी बालानन्द शर्मालगायतलाई बैठकमा हालसम्म गरेको कामका लागि धन्यवाद ज्ञापन गरिएको थियो ।

बैठकमा प्रधानमन्त्री देउवाले खोपको कमी हुन नदिन र नागरिकलाई निःशुल्क उपलब्ध गराउन निर्देशन दिएका थिए । दाताहरूसँग सहयोग माग्न र सरकार आफैंँले पनि खरिद गर्ने थप प्रक्रिया अगाडि बढाउन प्रधानमन्त्री देउवाले निर्देशन दिएका थिए ।

यस वर्षको अन्त्यसम्ममा सबै नागरिकलाई खोप उपलब्ध गराउने सरकारी लक्ष्य पूरा गर्ने दिशामा अगाडि बढ्न प्रधानमन्त्री देउवाले निर्देशन दिएका थिए ।

बैठकमा स्वास्थ्य मन्त्रालयको तर्फबाट असोज मसान्तसम्ममा एक चौथाइ जनसंख्यालाई खोप उपलब्ध गराउने सरकारी लक्ष्यमा पहिलो डोज पाउने नागरिकको तथ्यांकले कभरेज गरेको बताइएको थियो ।

फाइजर एक लाख डोज आइसकेको, मोडर्ना ४० हजार डोज आउँदै गरेको र चीनबाट भेरोसेल ४० लाख डोज आउँदै गरेको जानकारी मन्त्रालयले दिएको थियो । अन्य दाताबाट पनि खोप आउने क्रममा रहेको बैठकमा जानकारी दिइएको थियो ।