वागमतीको मुख्यमन्त्रीमा एकीकृत समाजवादीका पाण्डेको दाबी प्रस्तुत, ५९ सांसदको समर्थन
वागमतीको मुख्यमन्त्रीमा नेकपा (एकीकृत समाजवादी)का संसदीय दलका नेता राजेन्द्र पाण्डेले बुधबार दाबी प्रस्तुत गरेका छन्।
काठमाडौं, कात्तिक १० : वागमतीको मुख्यमन्त्रीमा नेकपा (एकीकृत समाजवादी)का संसदीय दलका नेता राजेन्द्र पाण्डेले बुधबार दाबी प्रस्तुत गरेका छन् ।
उनलाई पाँच दलीय गठबन्धनका ५९ सांसदको समर्थन छ । १०९ सदस्यीय प्रदेशसभामा सरकार गठनका लागि ५५ सांसदको समर्थन आवश्यक हुन्छ ।
यसअघि मुख्यमन्त्री अष्टलक्ष्मी शाक्यले प्रदेशसभामा सम्बोधनपछि प्रदेश प्रमुख यादवचन्द्र शर्मालाई राजीनामा बुझाएकी थिइन् ।
त्यसलगत्तै प्रदेश प्रमुख शर्माले बिहीबार ३ बजेसम्ममा मुख्यमन्त्रीको दाबी प्रस्तुत गर्न आह्वान गरेका थिए । बुधबार नै पाण्डेले ५९ सांसदको हस्ताक्षरसहित प्रदेश प्रमुखसमक्ष दाबी प्रस्तुत गरेका हुन् ।
वागमती प्रदेशसभामा माओवादी केन्द्रका २३, कांग्रेसका २२, एकीकृत समाजवादीका १३, जसपाका एक, विवेकशील साझाका तीन, नेमकिपाका दुई, राप्रपाका दुई र एमालेका ४३ सांसद छन् ।
उनको समर्थनमा प्रदेशसभामा प्रतिनिधित्व गर्ने चारवटा राजनीति दलले सर्मथनसहित हस्ताक्षर गरी दाबी पत्र बुझाइएको प्रदेश प्रमुख सचिवालयले जनाएको छ ।
प्रदेश प्रमुख शर्माले नेपालको संविधानको धारा १६९ को उपचार एकको खण्ड क बमोजिम नयाँ सरकार गठन गर्न बिहीबार अपराह्न ३ बजेसम्म समयसीमा निर्धारण गरेअनुसार मुख्यमन्त्री पदका लागि प्रत्यासी पाण्डेले आजै दाबी पत्र दर्ता गराएका थिए ।
यसअघि मुख्यमन्त्री शाक्यले दिएको राजीनामा बुधबार नै स्वीकृत भएको थियो ।
-1788856868.jpg)
