एकीकृत समाजवादीद्वारा मन्त्रीहरूलाई  १० बुँदे निर्देशन : विवादमा पर्ने काम नगर्नू 

काठमाडौं, कात्तिक १० : पाँच दलीय गठबन्धनको भावनाअनुरूप अन्य दलहरूसँग सहकार्य गर्न पनि एकीकृत समाजवादीले बताएको छ। निजी स्वार्थ, अनियमितता र भ्रष्टाचारबाट मुक्त रहन पनि निर्देशन दिइएको छ।

२०७८ असोज ५–७ मा बसेको पार्टीको केन्द्रीय कमिटीको प्रथम बैठक र २०७८ असोज २१ गतेको स्थायी कमिटीको सातौं बैठकले गरेका निर्णयहरुलाई मिति २०७८ कात्तिक ९ गते अन्तर पार्टी निर्देशनमार्फत देशभरका सम्पूर्ण पार्टी कमिटी एवं संगठनहरुलाई प्रेषित गरिएको हो।

निर्देशनमा इमान्दारी र कर्तव्य निष्ठाका साथ काम गर्न, राष्ट्र र जनताको हितलाई केन्द्रबिन्दुमा राखेर काम गर्न, निजी स्वार्थ, अनिमियतता र भ्रष्टाचारबाट मुक्त रहन भनिएको छ।

त्यस्तै योग्यता, क्षमता र कार्यसम्पादनमा उत्कृष्टताका आधारमा व्यक्तिको छनौट गरी जिम्मेवारी दिन, स्वच्छ र सादा जीवन, असल आचरण र संस्कारको अवलम्बन गर्न, पार्टीको नेतृत्व र सम्बन्धित विभागसँग समन्वय गरी काम गर्न र पार्टीको निर्देशन र सल्लाहलाई पालना गर्न पनि भनिएको छ।

सम्बन्धित क्षेत्रका विज्ञ तथा अनुभवी व्यक्तिहरूबाट नियमित रूपमा राय परामर्श लिन, नेता, कार्यकर्तासँग जीवन्त सम्पर्क राखी छिटोछरितो ढंगले काम गर्न पनि निर्देशनमा भनिएको छ।