सर्वोच्चमा बुधबार ११ इजलासमा २७८ मुद्दाको पेशी सूची, सुनुवाइ भने अनिश्चित

काठमाडौं, कात्तिक १० : सर्वोच्च अदालतमा बुधबार ११ वटा इजलासका लागि दुई सय ७८ थान मुद्दाको पेशी तोकिएको छ ।

तर, प्रधानन्यायाधीश चोलेन्द्रशम्शेर जबराको बहिर्गमनका लागि चौतर्फी दबाब बढिरहँदा बुधबार पनि सर्वोच्चमा इजलास बस्ने सम्भावना कमजोर छ ।

प्रधानन्यायाधीश जबराले बुधबारका लागि दुईवटा पूर्ण इजलास पनि तोकेका छन् । त्यसमध्ये एउटा प्रधानन्यायाधीशको एकल पूर्ण इजलास छ । अन्य संयुक्त इजलास तोकिएको छ । अर्को संवैधानिक इजलास हो, जसमा प्रधानन्यायाधीश राणासहित न्यायाधीशहरू दीपककुमार कार्की, मीरा खडका, हरिकृष्ण कार्की र विश्वम्भरप्रसाद श्रेष्ठलाई तोकिएको छ ।

सर्वोच्चका १५ जना न्यायाधीश प्रधानन्यायाधीश जबराको बहिर्गमनका पक्षमा उभिएका छन् । बुधबार पनि उनीहरू अलग्गै छलफलमा छन्, इजलासमा जाने सम्भावना कम छ ।

नेपाल बार एसोसिएन, सर्वोच्च बार, पूर्वप्रधानन्यायाधीशहरू, पूर्वन्यायाधीश फोरम, वरिष्ठ अधिवक्ताहरूले प्रधानन्यायाधीश जबराको बहिर्गमनको पक्षमा उभिएका छन् । नेपाल बारले त देशव्यापी इजलास बहिष्कारसहित आन्दोलनमा उत्रिने चेतावनी नै दिएको छ ।