प्रधानन्यायाधीश जबराले राजीनामा दिनुपर्ने नेपाल बारका सल्लाहकारको निष्कर्ष

काठमाडौं, कात्तिक ९ : नेपाल बार एसोसिएसनको सल्लाहकार समिति बैठकले प्रधानन्यायाधीश चोलेन्द्रशम्शेर राणाले पदबाट राजीनामा दिनुपर्ने निष्कर्ष निकालेको छ ।

सल्लाहकार समितिका ९९.५ प्रतिशत सदस्यले प्रधानन्यायाधीशले पदबाट राजीनामा दिनु उपयुक्त हुने निष्कर्ष दिएको बैठकपछि अधिवक्ता टीकाराम भट्टराईले सञ्चारकर्मीहरूलाई जानकारी दिए ।

नेपाल बारको बैठकबाट थप निर्णय लिइने उनले बताए । ‘उहाँले अविलम्ब राजीनामा गर्नुपर्छ भन्ने सल्लाहकार समितिको बैठकमा ९९.५ प्रतिशतको सुझाव आएको छ,’ अधिवक्ता भट्टराईले भने, ‘अब नेपाल बारको कार्यसमिति बैठकले यसबारे निर्णय लिन्छ । उहाँले राजीनामा गर्नुभएन भने देशव्यापी आन्दोलन गर्नुपर्छ भन्ने सल्लाह समितिको बैठकको निचोड छ ।’