राजीनामा दिएर ‘फेस सेभ’ गर्न प्रधानन्यायाधीशलाई कानून व्यवसायीको आग्रह

काठमाडौं, कात्तिक ८ : कानून व्यवसायीहरूले राजीनामा दिएर ‘फेस सेभ’ गर्न प्रधानन्यायाधीश चोलेन्द्रशम्शेर जबरालाई सल्लाह दिएका छन् । रिपोर्टर्स क्लबको साक्षात्कार कार्यक्रममा बोल्दै उनीहरूले सर्वोच्च अदालतकै न्यायाधीशहरूले ‘विद्रोह’ गरेको सन्दर्भमा राजीनामा दिएर समस्यालाई निकास दिनुमै प्रधानन्यायाधीश जबराको हितमा हुने बताए ।

पूर्वमहान्यायाधिवक्ता तथा वरिष्ठ अधिवक्ता रमण श्रेष्ठले प्रधानन्यायाधीशले ढिलो नगरी अब २–३ घण्टाभित्रै राजीनामा दिनुपर्ने बताए । ‘उहाँले आजै राजीनामा दिनुपर्छ । व्यक्तिगत रूपमा पनि यसले हित हुँदैन, उहाँ जति बस्नुहुन्छ उहाँलाई त्यति ठूलो क्षति हुन्छ,’ श्रेष्ठले भने, ‘न्यायालय र व्यक्तिगत क्षति रोक्ने हो भने तत्काल राजीनामा दिनुपर्छ । १४ जना न्यायाधीशले विद्रोह गर्नुभयो । कमान्डर मात्रै बाँकी भएको युद्ध कस्तो हुन्छ ? धेरै समय नलगाउनुहोस् । अब २–४ घण्टाभित्रै राजीनामा दिनुपर्छ ।’

प्रधानन्यायाधीशमाथि अझै धेरै प्रश्न उठ्नेवाला रहेको दाबी गर्दै श्रेष्ठले भने, ‘अहिले बाहिर–बाहिरको कुरा आएको छ, भित्री कुरा प्रवेश गरेपछि अझै छताछुल्ल हुन्छ । धेरै घण्टा पनि नलगाउनुहोस । तत्काल राजीनामा दिनुहोस् ।’

यस्तै, पूर्वमहान्यायाधिवक्ता मुक्ति प्रधानले अहिलेको अवस्थामा न्यायालयको साख जोगाउनका लागि प्रधान्यायाधीशले निकास दिनुपर्ने बताए । ‘न्यायालयको विषयमा गम्भीर प्रश्न उठेको छ । प्रधानन्यायाधीशको बारेमा जुन विषय उठान भएका छन् । उहाँमाथि जति पनि आरोप र विवाद आएका थिए, त्यो स्पष्ट पार्ने जिम्मेवारी थियो । तर अब समय घर्किसकेको छ, फस्र्योट गर्ने समय गुज्रिसकेको छ,’ उनले भने, ‘न्यायपालिका जनताको अभिभावक हो । त्यसको भावना र मर्मलाई न्यायिक नेतृत्वले आत्मसात गर्नुभएन । राजनीतिक दलसँग सौदावाजी गर्नुभयो ।’

वरिष्ठ अधिवक्ता परशुराम कोइरालाले पनि प्रधानन्यायाधीश जबराले राजीनामा दिएर फेस सेभ गर्नुपर्ने बताए । मैदानमा अब टिम क्याप्टेनले मात्रै खेलेर केही नहुने भन्दै उनले प्रधानन्यायाधीशले राजीनामा दिँदा नै राम्रो हुने तर्क गरे । १४ जना न्यायाधीशले फुलकोर्टमा जाँदैनौँ भन्नु ठूलो प्रश्न भएको उनले बताए ।

वरिष्ठ अधिवक्ता महेश नेपालले भने प्रधानन्यायाधीश जबराले स्वेच्छाले राजीनामा दिए अलग कुरा भएको तर कसैले माग्दैमा राजीनामा दिन नहुने धारणा राखे । प्रधानन्यायाधीश जबराको सवालमा कुनै एउटा विषयलाई हेरेर हट्नुपर्छ वा पर्दैन भन्न नहुने उनको टिप्पणी थियो । ‘मलाई चित्त बुझ्यो कि बुझेन भनेर राजीनामा वा हट्नुपर्छ भन्ने कुरा गर्नुहुँदैन, प्रधानन्यायाधीशले संवैधानिक अधिकारभन्दा बाहिर गएर भूमिका खेलेको हो भनेर मान्ने हो भने उहाँलाई राजीनामा दिएर मात्रै उन्मुक्ति दिनुहुँदैन । प्रतिनिधिसभामा महाभियोग प्रस्ताव दर्ता गर्नुपर्छ,’ उनले भने, ‘साँच्चै नै उहाँले गलत गर्नुभएको छ भने उहाँलाई महाभियोग लगाएर पदबाट हटाउनुप¥यो । दलहरूले आफ्नो दायित्व पूरा नगर्ने अनि भन्ने के भने प्रधानन्यायाधीशले ठाउँ खाली गर्नुपर्छ, यसको म पक्षमा छैन ।’