प्रधानन्यायाधीशसम्बन्धी विवादमा धारणा बनाउन नेपाल बारको बैठक बस्दै

काठमाडौं, कात्तिक ८ : प्रधानन्यायाधीश चोलेन्द्रशम्शेर जबराको सम्बन्धमा उत्पन्न विवादबारे धारणा बनाउन नेपाल बार एसोसिएसनको बैठक केहीबेरमा सुरु हुँदैछ ।

सर्वोच्च अदालतका दैनिक कार्य सञ्चालनमा मनोमानी गरेकोलगायत विवादका कारण प्रधानन्यायाधीश जबरा चौतर्फी घेराबन्दीमा परेका छन् ।

प्रधानन्यायाधीश जबराले सोमबार डेढ बजेका लागि बोलाएको फुलकोर्ट बैठकमा सर्वोच्च अदालतका १४ जना न्यायाधीशले सहभागी नहुने आइतबार निर्णय गरेका थिए । अहिले केहीबेरमा न्यायाधीशहरूले पनि अनौपचारिक छलफल गर्न लागेको सर्वोच्च स्रोतले जनाएको छ ।

बार महासचिव लीलामणि पौडेलले यस प्रकरणबारे धारणा बनाउन बैठक बस्न लागेको जानकारी दिए । ‘आजै धारणा सार्वजनिक हुन सक्छ,’ पौडेलले भने ।

सर्वोच्चका न्यायाधीशहरू नै प्रधानन्यायाधीशका काम कारवाहीप्रति असन्तुष्ट देखिँदा नेपाल बार भने केही नरम देखिएको छ । सोमबार बोलाइएको फुलकोर्ट बैठकमा वरिष्ठ अधिवक्ताको उपाधि वितरणबारे पनि निर्णय गर्ने कार्यसूची छ ।