ब्रिटिस गोर्खा भूपू सैनिकको आन्दोलनमा १२ संघसंस्थाको ऐक्यबद्धता

काठमाडौं भदौ १ : आदिवासी जनजातिहरूका १२ वटा संघसंस्थाले ब्रिटिस गोर्खा भूपू सैनिकहरूको आन्दोलनमा ऐक्यवद्धता जनाएका छन् ।

बेलायती गोर्खा भूपू सैनिकहरू समान पेन्सन र अन्य सुविधाको मागसहित दुई सातादेखि बेलायती प्रधानमन्त्री कार्यालय अगाडि ‘रिले अनसन’मा हुँदै ‘आमरण अनसन’मा छन् ।

गोर्खा संयुक्त संघर्ष समितिका अभियान निर्देशक ज्ञानराज राई, सचिव धन गुरुङ र महिला अभियन्ता पुष्प राना घले आमरण अनसनमा छन् । उनीहरूको स्वास्थ्य नाजुक बन्दै जाँदै सरकारले ध्यान दिन नसकेको ती संघसंस्थाको आरोप छ ।

उनीहरू ३२ वर्षदेखि समानता र न्यायको मागका साथ संघर्ष गर्दै आएका छन् । बेलायती सरकारको लापरवाही र हेलचेक्र्याइँका कारण वर्षौँदेखि थाती रहेको मुद्दालाई समाधान गर्न नेपाल सरकारले कूटनीतिक वार्ता गर्नुपर्ने उनीहरूको माग छ ।

सरकारले सोमबारको मन्त्रिपरिषद् बैठकबाट उनीहरूको मागका सम्बन्धमा कूटनीतिक पहल थाल्ने निर्णय लिएको छ ।