स्रोत नखुलेको रकमसहित चारजना पक्राउ  

काठमाडौं, साउन २७ : स्रोत नखुलेको रकमसहित काठमाडौंमा चारजना पक्राउ परेका छन्।

काठमाडौं महानगरपालिका-१३ ताहचल बस्ने ५३ वर्षीय तरुण अग्रवाललगायत चारजनालाई स्रोत नखुलेको नगद ९१ लाख ९६ हजार रुपैयाँसहित मंगलबार दिउँसो प्रहरीले पक्राउ गरेको हो। 

काठमाडौं महानगरपालिका-२२ गणबहालस्थित तरुणको तनुज इन्टरनेशनल प्रालिमा अवैध रकम संकलन गरी राखेको भन्ने सूचना प्राप्त हुनासाथ महानगरीय प्रहरी परिसर काठमाडौं र महानगरीय प्रहरी वृत्त जनसेवाबाट खटिएको प्रहरीले तलासी गर्दा स्रोत नखुलेको रकम फेला पारी उनीहरुलाई पक्राउ गरेको जनाइएको छ। 

उनीहरुलाई आवश्यक अनुसन्धानका लागि सम्पत्ति शुद्धीकरण अनुसन्धान विभाग ललितपुर पठाइएको छ।