प्रतिनिधिसभा विघटनविरुद्ध रिट दर्ताका लागि सर्वोच्च अदालतमा भेला हुँदै विपक्षी गठबन्धनका सांसदहरू

काठमाडौं, जेठ १० : प्रधानमन्त्री केपी ओलीको सिफारिसमा राष्ट्रपति विद्यादेवी भण्डारीले गरेको प्रतिनिधिसभा विघटनविरुद्ध रिट दायर गर्न विपक्षी गठबन्धनका सांसदहरू अहिले धमाधम सर्वोच्च अदालतमा भेला भइरहेका छन् ।

सिंहदरबारमा रिट निवेदनमा हस्ताक्षर, औंठाछाप र नागरिकता संकलनपछि उनीहरू सर्वोच्चमा भेला हुन थालेका हुन् ।

रिट निवेदनमा प्रतिनिधिसभाका बहुमत सांसदको हस्ताक्षर रहेको बताइएको छ ।

रिटमा कांग्रेस, माओवादी केन्द्र, जसपाको उपेन्द्र यादव–डा. बाबुराम भट्टराई पक्ष, एमालेको माधवकुमार नेपाल–झलनाथ खनाल पक्ष र राष्ट्रिय जनामोर्चाका सांसदहरूको हस्ताक्षर छ ।

सर्वोच्च अदालत जानुअघि सबै दलका शीर्ष नेता सिंहदरबारमा बैठकमा छन् । बैठक सकेर उनीहरू सर्वोच्च जाने तयारीमा छन् ।