१४९ सांसद नै कानूनी लडाइँमा बढ्छौँः गगन थापा

काठमाडौं, जेठ ८ : कांग्रेस युवा नेता गगन थापाले वैकल्पिक सरकारको प्रस्तावमा हस्ताक्षर गरेका एक सय १४९ सांसदले प्रतिनिधिसभा विघटनविरुद्ध कानूनी लडाइँ छेड्ने उद्घोष गरेका छन् ।

सामाजिक सञ्जालमार्फत प्रतिनिधिसभा विघटनविरुद्ध धारणा सार्वजनिक गर्दै थापाले आफ्नो संवैधानिक हकका लागि अदालतमै उभिएर कानूनी लडाइँ लड्न तयार रहनुपर्ने बताएका हुन् ।

‘१४९ सांसदको संविधानको धारा ७६ (५) बमोजिमको दाबीलाई संसद्मा परीक्षण नै नगरी राष्ट्रपति र प्रधानमन्त्रीले संविधानको बर्खिलाफ गरेको निर्णयविरुद्ध हामी अदालत गएनौँ भने त फागुन ११ को सर्वोच्च अदालतकै फैसलाको अपमान हुन्छ,’ थापाले लेखेका छन्, ‘अतः राजनीतिक लडाइँसँगै हामी १४९ सांसद हाम्रो संवैधानिक हकको लागि अदालतमै उभिएर कानूनी लडाइँ लड्न तयार रहनुपर्छ ।’