युएई–नेपाल सिरिज भोलिदेखि

काठमाडौं, माघ १०: युएईविरूद्ध नेपालको अन्तर्राष्ट्रिय क्रिकेट सिरिज शुक्रबारदेखि सुरू हुँदैछ । दुबईको आईसीसी एकेडेमीमा हुने सिरिजमा १६ सदस्यीय नेपाली ....

काठमाडौं प्रेसबिहीबार, माघ १०, २०७५

काठमाडौं, माघ १०: युएईविरूद्ध नेपालको अन्तर्राष्ट्रिय क्रिकेट सिरिज शुक्रबारदेखि सुरू हुँदैछ । दुबईको आईसीसी एकेडेमीमा हुने सिरिजमा १६ सदस्यीय नेपाली टोलीको नेतृत्व पारस खड्काले गर्दैछन् । सिरिज अन्तर्गत नेपाली टिमले युएईविरूद्ध तीन वटा एकदिवसीय र तीन वटा टी–२० क्रिकेट खेल्नेछ ।

टिम

सिरिजमा सबैको आँखा सन्दीप लामिछाने र कप्तान पारस खड्कामाथि छ । बिरामी शरद भेषवाकरले टिमबाट नाम फिर्ता लिएका छन् । अविनाश बोहरा, भीम सार्की, पवन सर्राफ र सन्दीप जोरा सिनियर टिममा समावेश गरिएका छन् ।

एक वर्षअघि यही मैदानमा भएको खेलपछि लेग–स्पिनर सन्दीप लामिछानेलाई तत्कालीन डेल्ही डेयरडेभिल्सले आईपिएलका लागि छनोट गरेको थियो । त्यसयता लामिछानेले प्रायः सबै टी–२०, अष्ट्रेलियाको बिग ब्यास र बंगलादेशको प्रिमियर लिग खेलिसकेका छन् ।

नेपाली टिमका कप्तान खड्काले भेषवाकरको अनुपस्थितिले खेलमा प्रभाव पर्ने र व्याटिङमा सुधार गनुपर्ने यसअघि नै बताइसकेका छन् ।

यसपटक युएईका तीन प्रभावशाली खेलाडी पूर्व–कप्तान रोहन मुस्तफा, अहमद राजा र रमिज शाहजाद टिममा हुने छैनन् । ईमिरेट्स क्रिकेट बोर्ड (ईसीबी) को आचारसंहिता उल्लंघन गरेको आरोपमा उनीहरूलाई आठ साताका लागि निलम्बन गरिएको छ । टिमको नेतृत्व मोहम्मद नाविदले गर्नेछन् ।

खेल कस्तो होला ?

नेपाल र युएई एक–अर्कासँग परिचित प्रतिद्वन्द्वी हुन् । दुवै देशले एसीसीमा प्रतिस्पर्धा गर्दै आएका छन् । गत फेब्रुअरीमा नामिबियामा भएको वल्र्ड क्रिकेट लिग डिभिजन–२ र त्यसपछि वल्र्डकप क्वालिफायरमा पनि एक–अर्का विरूद्ध खेलेका थिए ।

दुवै टिम सशक्त छन् । वल्र्ड क्रिकेट लिग डिजिभन–२ को समूह विजेता नेपाल फाईनलमा युएईबाट पराजित भयो । त्यसपछि जिम्बाब्वेमा भएको वार्म–अप म्याचमा नेपालले युएईलाई हराएको थियो ।

सेप्टेम्बरमा सम्पन्न एशिया कप क्वालिफायरमा नेपाली टिम युएईसँग हारेको थियो । तर दुवै देश एशिया कपका लागि छनोट भएनन् । सन् २०१२ मा शारजहाँमा भएको एसीसी ट्रफीको फाईनल खेल बराबरी सकिएपछि नेपाल र युएईले उपाधि बाँडेका थिए ।

नेपालको यो दोश्रो एकदिवसीय क्रिकेट सिरिज हो । नेपाली टिमले यस अघि सन् २०१८ मा नेदरल्यान्ड्स विरूद्ध पहिलो एकदिवसीय क्रिकेट खेलेको थियो । दुई खेलको उक्त श्रृंखला एक–एक जीतको बराबरीमा सकिएकोे थियो । नेपालले गत वर्ष मात्रै आईसीसीबाट एकदिवसीय क्रिकेट खेल्ने राष्ट्रको मान्यता पाएको हो । आईसीसीको एकदिवसीय मान्यता पाउने नेपाल कान्छो टिम हो ।

सिरिजको तालिका निम्नानुसार रहेको छ

– माघ ११ गते – पहिलो एकदिवसीय

– माघ १२ गते – दोश्रो एकदिवसीय

– माघ १४ गते – तेश्रो एकदिवसीय

– माघ १७ गते – पहिलो टी–२०

– माघ १८ गते – दोश्रो टी–२०

– माघ २० गते – तेश्रो टी–२०

नेपाली खेलाडीहरू

१. पारस खड्का (कप्तान)

२. ज्ञानेन्द्र मल्ल (उपकप्तान)

३. अविनाश बोहरा

४. वसन्त रेग्मी