कास्की निर्वाचन क्षेत्र नं १ मा आठ करोडका ७७ योजना सार्वजनिक

कास्की, मंसिर २२ : कास्की जिल्ला निर्वाचन क्षेत्र नं १ स्थानीय पूर्वाधार विकास साझेदारी कार्यक्रम एवं प्रदेश भौतिक पूर्वाधार विकास कार्यक्रम २०७७/०७८ अन्तर्गत छनोट भएका योजना सार्वजनिक गरिएको छ। पूर्वमन्त्री एवं प्रतिनिधिसभा सदस्य खगराज अधिकारी तथा प्रदेशसभा सदस्यद्वय मनबहादुर गुरुङ र दीपक कोइरालाले आठ करोड रुपैयाँ बराबरका ७७ योजना संयुक्तरुपमा सार्वजनिक गरेका हुन्।

निर्वाचन क्षेत्रअन्तर्गत रुपा गाउँपालिकामा ६ योजनामा एक करोड २० लाख रुपैयाँ, मादी गाउँपालिकाका नौ  योजनामा एक करोड २५ लाख रुपैयाँ र पोखरा महानगरपालिकाका १० वडामा एक करोड ५५ लाख रुपैयाँ विनियोजन गरिएको प्रतिनिधिसभा सदस्य अधिकारीले जानकारी दिए।

योजनाअन्तर्गत रुपा गाउँपालिकास्थित रामकोट—रामदी सडकमा ५२ लाख रुपैयाँ, मज्ञ्याङकोट–माउडाँडा सडकमा ३० लाख रुपैयाँ, मादी गाउँपालिका गोर्जे सामुदायिक भवनमा २० लाख रुपैयाँ, कदममार्ग सडक खानेपानी योजनामा २५ लाख रुपैयाँ र पोखरा –२८ स्थित डुडखोला पुलमा २५ लाख रुपैयाँ राखिएको छ।  

त्यसैगरी पोखरा –२७ तालचोक कृषिउपज संकलन तथा बिक्री केन्द्रमा २५ लाख रुपैयाँ, शिवचण्डी मोटर बाटो रुपामा २५ लाख रुपैयाँ, रुपा गाउँपालिका डेरी तथा कृषिउपज संकलन केन्द्रमा २० लाख रुपैयाँलगायत योजना छनोट गरिएको छ। 

योजना सार्वजनिक गर्दै सांसद अधिकारीले सबैको साथ र सहयोगबाट गुणस्तरीय तथा समयमा विकासनिर्माणका योजना सम्पन्न हुने विश्वास व्यक्त गरे।

प्रदेशसभा सदस्य गुरुङ र कोइरालाले सडक, खानेपानीसंँगै  उत्पादनमा जोड दिने गरी योजना छनोट गरिएको जानकारी दिँदै पुस महिनाभित्र योजना सम्झौता गरिनुपर्नेमा जोड दिए। जिल्ला समन्वय समिति कास्कीका प्रमुख बैनबहादुर क्षेत्री अधिकारीले विकासनिर्माणको अनुगमनलाई प्रभावकारी बनाइँदै आएको बताउँदै यसमा सबै पक्ष सचेत हुनुपर्नेमा जोड दिए।