यती एयरलाइन्सको १२ वर्षपछि सिमरा उडान

काठमाडौं, असोज १६ : निजी क्षेत्रको अग्रणी वायुसेवा प्रदायक संस्था यती एयरलाइन्सले १२ वर्षपछि अर्थात असोज २१ देखि सिमरामा नियमित उडान गर्ने भएको छ।

एयरलाइन्सले आफ्नो २२ औँ वार्षिकोत्सवका अवसरमा नयाँ गन्तव्यको रुपमा सिमरा पुनः उडान सञ्चालन गर्ने घोषणा गरेको छ। सन् २००८ मा काठमाडौंं-सिमरा उडान भरेको यती एअरलाइन्सले १२ वर्षपछि आगामी असोज २१ देखि बाराको सिमरा विमानस्थलमा उडान भर्न लागेको हो। सिमरा यतीको नवौं उडान गन्तव्य हो। 

एअरलायन्सका प्रमुख सुरक्षा अधिकृत तथा प्रवक्ता सुदर्शन बर्तौलाले कोभिड–१९ को सङ्क्रमणको समयमा उच्च सर्तकता अपनाएर सिमरा उडान गर्न लागेको जानकारी दिए। “सिमरा उडानबारे सम्बन्धित निकायसँग स्वीकृत लिई असोज २१ देखि दैनिक दुई उडानमार्फत सेवा विस्तार गर्नेछौँ”, उनले भने।

यतीले सिमरामा जेटईस्ट्रीम-४१ विमानमार्फत प्रत्येक दिन विहान ९:०० बजे र साँझ ४:४५ बजे काठमाडौंदेखि उडान भर्दैछ। एअरलाइन्सका बिक्री तथा बजार निर्देशक शरल एस जे वि राणाका अनुसार यात्रुहरुको माग बमोजिम पुनःसेवा प्रारम्भ गर्न लागेको जानकारी दिए।