कर्णाली स्वास्थ्य विज्ञान प्रतिष्ठानका चार स्वास्थ्यकर्मीमा कोरोना संक्रमण पुष्टि

काठमाडौं, असार १० : कर्णाली स्वास्थ्य विज्ञान प्रतिष्ठानका चार स्वास्थ्यकर्मीमा कोरोना संक्रमण पुष्टि भएको छ। मंगलबार राति गरिएको पीसीआर परीक्षणमा चार स्वास्थ्यकर्मीमा संक्रमण पुष्टि भएको हो।

प्रतिष्ठानका अनुसार संक्रमित स्वास्थ्यकर्मीले क्वारेन्टाइनमा बसेका र आइसोलेसनमा रहेका कोरोना संक्रमितको रेखदेखमा खटिएका थिए। 

स्वास्थ्यकर्मीमा संक्रमण पुष्टि भएसँगै आज प्रतिष्ठानमा कार्यरत सम्पूर्ण स्वास्थ्यकर्मी र कर्मचारीको पीसीआर परीक्षण गरिने भएको छ।

स्वास्थ्यकर्मीमा कोरोना संक्रमण देखिएपछि प्रतिष्ठानले अर्को सूचना जारी नभएसम्म आकस्मिक बाहेकका सबै सेवा बन्द गरेको जनाएको छ।