पूर्वी पृतनामा उपरथी केसीको १४ महिने कमान्ड : चुनौतीबीच सुरक्षा व्यवस्थापन
काठमाडौं, साउन २७ : नेपाली सेनाको इटहरीस्थित पूर्वी पृतना हेडक्वार्टरको कमान्ड सम्हाल्दै आएका उपरथी गौरवकुमार केसीले आफ्नो नेतृत्व अवधि सफलताका साथ पूरा गरेका छन् ।
२०८० साल जेठ २५ गते पूर्वी पृतनापतिको जिम्मेवारी सम्हालेका उपरथी केसीले कोशी प्रदेशको जिम्मेवारी क्षेत्रभित्र सेनाको पेसागत तथा व्यावसायिक दक्षता अभिवृद्धि गर्नुका साथै रणनीतिक, पूर्वाधार निर्माण र सामाजिक सांस्कृतिक क्षेत्रमा महत्त्वपूर्ण योगदान पुर्याएका हुन् । यो पृतना कोशी प्रदेशको जिम्मेवारी क्षेत्र पनि हो ।
केसी पृतनाको कमाण्डमा देशभर भएको जेनजी पुस्ताको बिद्रोहमा आन्तरिक सुरक्षा, निर्वाचन र संवेदनशील स्थिति व्यवस्थापन गरे । नवयुवा आन्दोलनका क्रममा उत्पन्न जटिल परिस्थितिमा पूर्वी पृतनाको फौज सक्रिय रूपमा खटिएर महत्त्वपूर्ण व्यक्तिहरू तथा सरकारी एवं सार्वजनिक संरचनाहरूको सुरक्षामा ठूलो योगदान पुर्याएको थियो।
यस्तै गत फागुनमा सम्पन्न प्रतिनिधि सभा निर्वाचनमा सुरक्षाका दृष्टिले अत्यन्तै संवेदनशील मानिएको झापा निर्वाचन क्षेत्रका साथै कोशी प्रदेशका अन्य तराई र मध्यपहाडी जिल्लाहरूमा स्वच्छ, शान्तिपूर्ण र भयरहित वातावरणमा निर्वाचन सम्पन्न गराउन पृतना अन्तर्गतका फौजहरू विभिन्न स्थानमा तैनाथ भई जिम्मेवारी पूरा गरेका थिए। झापा तत्कालीन प्रधानमन्त्री केपी शर्मा ओली र वर्तमान प्रधानमन्त्री बालेन्द्र शाहको चुनावी भिडन्तका कारण चर्चामा थियो ।
हालसालै सुनसरीको देवानगञ्ज लगायतका क्षेत्रमा दुई समुदायबीच धार्मिक द्वन्द्व र भिडन्तको स्थिति उत्पन्न भई परिस्थिति अराजकतर्फ जान लागेपछि स्थानीय प्रशासनको अनुरोधमा कर्फ्यू घोषणा गरी सेना तुरुन्त परिचालन गरिएको थियो । नेपाल प्रहरी र सशस्त्र प्रहरी बलसँग प्रभावकारी समन्वय गर्दै सेनाले सम्भावित ठूलो जनधनको क्षति हुनबाट रोकेर स्थिति पूर्ण रूपमा नियन्त्रणमा लिएको थियो ।
पूर्वी नेपालका विभिन्न स्थानमा आएका प्राकृतिक प्रकोपका बेला नेपाली सेनाले अहोरात्र खटिएर राहत तथा उद्धार कार्य सञ्चालन गर्यो। विशेष गरी इलाम र झापा जिल्लाहरूमा गएको बाढी, पहिरो तथा डुबानका घटनाहरूमा पृतनाको फौजले धेरै ठाउँमा उद्धार कार्य गरी नागरिकको जीउधनको रक्षा गरेको थियो।
यसैगरी, सैनिक जनशक्तिको कार्यक्षमता र सुरक्षा निकायहरूबीचको समन्वय बढाउन केसीको नेतृत्वमा उच्च हिमाली र जोखिमयुक्त क्षेत्रमा उद्धार क्षमता बढाउने तालिम, मनसुनजन्य प्रकोपको पूर्वतयारी तथा विपद् व्यवस्थापन तालिम सञ्चालन गरिएको थियो ।
जङ्गी अड्डाको ढाँचामा पृतना क्षेत्रभित्र बृहत् फोटो तथा सैन्य सामग्री प्रदर्शनी आयोजना गरी नागरिकलाई सेनाको काम-कारबाहीबारे नजिकबाट बुझ्ने अवसर प्रदान गरिएको थियो। यस्ता सामाजिक तथा सार्वजनिक प्रवर्धनका कार्यहरूले गर्दा आम जनतामा नेपाली सेनाप्रतिको भरोसा, आस्था र नागरिक-सैनिक सम्बन्ध थप मजबुत बनेको केसीको भनाई छ । 
नेपालको राष्ट्रिय एकीकरण, इतिहास र सैनिक विरासतसँग जोडिएका सम्पदाहरूको पहिचान र संरक्षणमा उपरथी केसीको कार्यकालमा विजयपुर, सागुरी, उदयपुर र चौदण्डी गढीलगायत ऐतिहासिक क्षेत्रहरूलाई जोडेर पदयात्रा तथा निशान पदयात्रा कार्यक्रमहरूले इतिहास र वर्तमान पुस्ताबीचको सम्बन्धलाई जोड्दै सम्पदा संरक्षणमा नागरिक सहभागिता बढाउन ठूलो मद्दत पुर्याएको छ।
केसीकै कार्यकालमा राष्ट्रिय सुरक्षा र उत्तरी सीमा जोडिने रणनीतिक दृष्टिले अत्यन्त महत्त्वपूर्ण मानिएको खाँदबारी-किमाथाङ्का सडक निर्माणमा सेनाले उल्लेख्य प्रगति हासिल गरेको छ ।
केसीले ३७ बर्षे सैनिक सेवा अवधिबाट अर्को महिना अवकाश पाउँदै छन् । २०४७ सालमा नेपाली सेनाको अफिसर बाट सैनिक सेवामा प्रवेश गरेका थिए । केसीले यसअघि नेपाली सेनाको प्रवक्ता भएर समेत काम गरिसकेका छन् ।
केसीले अवकाश पाउने भएसँगै उपरथी शक्तिजंग बस्नेतले गत सोमबारदेखि इटहरीस्थित पूर्वी पृतना हेडक्वार्टरको नेतृत्व सम्हालिसकेका छन् ।
