‘पालिकाका आधारभूत अस्पतालहरुको प्रगति कमजोर छ’
उनले सरकारले देशभर निर्माण गर्ने लक्ष्य लिएका आधारभूत अस्पतालमध्ये हालसम्म केवल १७ प्रतिशत मात्रै निर्माण सम्पन्न भएको तथ्यांक प्रस्तुत गरिएको उल्लेख गरिन्।
काठमाडौं, साउन २१ः प्रतिनिधिसभा सांसद तोसिमा कार्कीले पालिका तहमा निर्माण गर्ने भनिएका आधारभूत अस्पतालहरूको प्रगति अत्यन्तै कमजोर रहेको बताएकी छन्।
बिहीबार शिक्षा, स्वास्थ्य तथा सूचना प्रविधि समितिको बैठकमा स्वास्थ्य तथा खाद्य स्वच्छता मन्त्रालयको विद्यमान अवस्था, समसामयिक विषय, चुनौती र भावी कार्ययोजनाका सम्बन्धमा छलफल क्रममा उनले यस्तो बताएकी हुन्।
उनले सरकारले देशभर निर्माण गर्ने लक्ष्य लिएका आधारभूत अस्पतालमध्ये हालसम्म केवल १७ प्रतिशत मात्रै निर्माण सम्पन्न भएको तथ्यांक प्रस्तुत गरिएको उल्लेख गरिन्।
उनले निर्माण सम्पन्न भएका अस्पतालमध्ये पनि कति अस्पताल सरकारले तोकेको मापदण्ड पूरा गरी पूर्ण रूपमा सञ्चालनमा आएका छन् भन्ने विवरण सार्वजनिक नगरिएको दाबी गरिन्।
‘सरकारले ५ शय्या र १५ शय्याका आधारभूत अस्पताल निर्माण गर्ने घोषणा गरेको वर्षौं बितिसकेको छ । तर हालसम्म १७ प्रतिशत मात्रै निर्माण सम्पन्न भयो, उनले भनिन्, ‘तर त्यो डाटामा निर्माण सम्पन्न भएकामध्य पुनःसञ्चालनमा कति छन भन्ने डाटा छैन् । मापदण्डले तोके बराबर सबै पूरा गरेर पुनःसंचालनामा रहेकाहरुको पनि अनुगमन जरुरी छ।’
उनले जनताको स्वास्थ्यमा लगानी गर्न सरकारले कहिल्यै कन्जुस्याइँ गर्न नहुने बताइन्।
उनले विकासको पहिलो सूचक भनेको नै स्वास्थ्य नागरिक भएको उल्लेख गर्दै भौतिक र मानसिक हिसाबले स्वास्थ्य भएका नागरिकले मात्र विकासमा आफ्नो भूमिका निर्वाह गर्न सक्ने बताइन्।
