गणेश नेपाली प्रकरण र मिडिया हाउसअगाडि गाडी पार्किङबारे छानबिन गर्न सांसद मल्लको माग

काठमाडौं, असार ३० : नेपाली कम्युनिस्ट पार्टी (नेकपा) का सांसद रमेश कुमार मल्लले गणेश नेपालीको आत्मदाहपछि उत्पन्न घटनाक्रम, मिडिया हाउसअगाडि गरिएको गाडी पार्किङ र नागरिकमाथि भएको भनिएको धरपकडबारे सरकारको ध्यानाकर्षण गराएका छन्।

मंगलबार बसेको प्रतिनिधिसभा बैठकमा बोल्दै सांसद मल्लले करिब डेढ महिनादेखि संसद्को रोस्ट्रमबाट प्रधानमन्त्रीले दिएको अभिव्यक्तिको विरोध भइरहेको भएपनि त्यस विषयमा प्रधानमन्त्रीले जवाफ नदिएको र संसद्बाट आवश्यक कदम नचालिएको भन्दै असन्तुष्टि जनाए।

उनले २५ वर्षीय युवा गणेश नेपालीको आत्मदाहबाट भएको निधनले देशलाई नै स्तब्ध बनाएको भन्दै उक्त घटनालाई तोडमोड गर्ने प्रयास भइरहेको आरोप लगाए।

पछिल्ला दिनमा काठमाडौंका विभिन्न स्थानमा सडक अवरोध, मिडिया हाउसअगाडि गाडी तेस्र्याउने तथा राजनीतिक गतिविधिका नाममा भएका घटनाको निष्पक्ष छानबिन हुनुपर्ने उनको माग थियो।

सांसद मल्लले मिडिया हाउसअगाडि शंकास्पद रूपमा गाडी पार्किङ गर्ने, प्रमुख प्रतिपक्ष दलका नेताको निवास खोज्दै जानेजस्ता गतिविधि गम्भीर विषय भएको बताए। उनले यस्ता गतिविधिमा संलग्नलाई सामान्य जरिवाना मात्रै नभई कडा कारबाही गर्नुपर्ने धारणा राखे।

‘राज्यले त्रास र सन्त्रासको माध्यमबाट शासन सञ्चालन गर्न खोज्नु गलत हो। यस्ता गतिविधि गर्ने र योजना बनाउनेमाथि छिटोभन्दा छिटो छानबिन गरी कारबाही गरिनुपर्छ,’ उनले भने।

उनले सत्तारूढ दलले विज्ञप्ति जारी गरेर मात्रै जिम्मेवारी पूरा नहुने भन्दै घटनालाई गम्भीर रूपमा लिन आग्रह गरे।