भौतिक पूर्वाधारसँगै शिक्षामा लगानी आवश्यक छ : सांसद मगर

काठमाडौं, असार ५ : राष्ट्रिय स्वतन्त्र पार्टीकी सासद इन्दिरा राना मगरले वर्तमान सरकारले सार्वजनिक गरेको बजेटले स्थानीय तह तथा जिल्लाबीचको पूर्वाधार विकासलाई प्राथमिकता दिएको बताएकी छन् ।  

शुक्रबार बसेको प्रतिनिधिसभा बैठकमा बोल्दै उनले एक जिल्लाबाट अर्को जिल्ला र एक पालिकाबाट अर्को पालिकालाई जोड्ने पुल निर्माण गर्नु विकास भएको बताइन् ।  

‘वर्तमान सरकारले सार्वजनिक गरेको बजेटले एक जिल्लाबाट अर्को जिल्लामा जोड्ने, एउटा पालिकाबाट अर्को पालिका जोड्ने एकदमै सिर्जनात्मक तरीकाले निर्णय गरेको छ। यसलाई म समर्थन गर्न चाहन्छु । पहिला त्यस्तो थिएन । एउटा पालिकाबाट आर्को पालिकाम जोड्ने पुल निर्माण गर्नु भनेको विकास हो । त्यो पनि एउटा समृद्धि हो,’ उनले भनिन्।

उनले भौतिक पूर्वाधारसँगै शिक्षामा लगानीको महत्व औँल्याउँदै बालबालिकामाथिको लगानी दीर्घकालीन राष्ट्र निर्माणको आधार हुने बताइन् । 

विद्यालयहरूमा शिक्षक दरबन्दीको समस्या अझै कायम रहेको बताउदै उनले करारमा कार्यरत शिक्षकहरू न्यून तलबमा काम गर्न बाध्य भएको बताइन् । पाँच सय विद्यार्थी अध्ययनरत विद्यालयमा सीमित शिक्षक दरबन्दी हुँदा गुणस्तरीय शिक्षा प्रदान गर्न कठिन हुने बताइन् ।  

उनले भनिन्, ‘हामी ठूला भवनका लागि लगानी गर्छौ, तर लगानी बालबालिकाको लागि गर्दनौं । हरेक विद्यालयमा एउटा दरबन्दी छ । करारमा बसेकाहरू १५ हजार २० हजारमा तलब खाएर बसेका छन् । ५ सय जना विद्यार्थी भएको ठाउँमा २३ जना दरबन्दी छ भने कसरी पाँच सय जना विद्यार्थीलाई राम्रो शिक्षा दिन सक्छौँ । त्यसैले विद्यालयमा हामीले लगानी गर्नु पर्दछ । ’