कृषिमा आत्मनिर्भरता र वन संरक्षणमा सरकार गम्भीर छ : मन्त्री गीता चौधरी

काठमाडौं, जेठ १३ : कृषि, वन तथा पर्यावरणमन्त्री गीता चौधरीले सरकारले कृषकलाई समयमै रासायनिक मल उपलब्ध गराउन विशेष पहल गरिरहेको बताएकी छन्। 

बुधबार प्रतिनिधिसभा बैठकमा सांसदहरूले उठाएका प्रश्नहरूको जवाफ दिँदै उनले चालु आर्थिक वर्षमा हालसम्म ५ लाख ५४ हजार ७६२ मेट्रिक टन रासायनिक मल आपूर्ति भइसकेको र ४ लाख ६३ हजार १०७ मेट्रिक टन किसानलाई बिक्री भइसकेको जानकारी दिइन्।

‘चालु आर्थिक वर्षको असार मसान्तसम्म करिब ६ लाख मेट्रिक टन मल किसानलाई अनुदानमा उपलब्ध गराइनेछ, जुन अहिलेसम्मकै सबैभन्दा बढी परिणाम हुनेछ,’ उनले भनिन्।

मन्त्री चौधरीले मध्यपूर्वको द्वन्द्वका कारण मल आपूर्तिमा समस्या आएको उल्लेख गर्दै धान रोपाइँको समयमा अभाव हुन नदिन मन्त्रालयले विशेष ध्यान दिएको बताइन्।

‘धान रोपाइँको सिजनमा मलको अभाव नहोस् भनेर मन्त्रालयले विशेष ध्यान दिएको छ। भारतसँग जीटुजी माध्यमबाट ५० हजार मेट्रिक टन मल खरिद प्रक्रिया सुरु गरिएको छ,’ उनले भनिन्।

अनुदानको मल वितरणलाई पारदर्शी बनाउन ‘अनुदानको मल वितरण व्यवस्थापन निर्देशिका, २०८२’ कार्यान्वयनमा ल्याइएको र मल व्यवस्थापन सूचना प्रणाली सञ्चालन गरिएको पनि उनले बताइन्।

बीउविजन उत्पादनका विषयमा बोल्दै उनले धान, गहुँ, मकै, मसुरो तथा तोरीको स्रोत बीउ डिजिटल प्रणालीमार्फत वितरण भइरहेको जानकारी दिइन्। 

‘स्वदेशी बीउविजन प्रवद्र्धन गर्न स्रोत बीउ उत्पादनमा ३० प्रतिशतसम्म र उन्नत बीउ उत्पादनमा ५० प्रतिशतसम्म अनुदान उपलब्ध गराइएको छ,’ उनले भनिन्।

उखु किसानको समस्या समाधानमा मन्त्रालय गम्भीर रहेको उल्लेख गर्दै मन्त्री चौधरीले चालु आर्थिक वर्षमा उखु किसानलाई करिब १३ अर्ब ४२ करोड रुपैयाँ भुक्तानी हुनुपर्नेमा ९ अर्ब रुपैयाँ भुक्तानी भइसकेको जानकारी दिइन् 

‘बाँकी रकम यही आर्थिक वर्षभित्र भुक्तानी हुने प्रतिबद्धता प्राप्त भएको छ,’ उनले भनिन्। कृषि उत्पादनले उचित मूल्य नपाएको गुनासोबारे सरकारले न्यूनतम समर्थन मूल्य निर्धारण गर्दै आएको बताउँदै उनले बर्से धान र गहुँको मूल्य निर्धारण गरिएको जानकारी दिइन्।

दुग्ध किसानको भुक्तानीबारे उनले भनिन्, ‘मङ्सिरदेखि माघसम्मको १८ करोड रुपैयाँ भुक्तानी गरिसकिएको छ र बाँकी २० करोड असार १५ भित्र भुक्तानी गरिनेछ।’

वन्यजन्तु तथा मानव द्वन्द्वबारे बोल्दै उनले बाँदर, निलगाई, बदेललगायतका वन्यजन्तुबाट हुने क्षतिको राहत वितरण भइरहेको जानकारी दिइन्। 

‘जङ्गली रातो बाँदरलाई कृषि हानिकारक वन्यजन्तुको रूपमा घोषणा गरी नियन्त्रण प्रक्रिया अघि बढाइएको छ,’ उनले सुनाइन्। वन क्षेत्र संरक्षणबारे बोल्दै मन्त्री चौधरीले नेपालको वन क्षेत्र हाल ४६ दशमलव ०८ प्रतिशत पुगेको बताइन्।

जलवायु परिवर्तनका कारण नेपाल उच्च जोखिममा रहेको उल्लेख गर्दै उनले राष्ट्रिय जलवायु नीति तथा विभिन्न कार्यक्रममार्फत जोखिम न्यूनीकरणका काम भइरहेको जानकारी दिइन्। 

मन्त्री चौधरीले कृषि, खाद्य सुरक्षा र वन संरक्षणलाई सरकारले उच्च प्राथमिकतामा राखेको बताउँदै किसान र वन संरक्षणमा खटिएका सुरक्षाकर्मीको योगदानप्रति सम्मान व्यक्त गरिन्।