निमुखा जनताको अवस्था बदल्न रास्वपा सचेतक परियारको माग

काठमाडौं, जेठ १३ : सत्तारुढ रास्वपाका सचेतक प्रकाशचन्द्र परियारले जनक्रान्तिको  जगमा आएको गणतन्त्रमा जनताले आज पनि विभेदको दुष्चक्र भोग्नुपरेको बताएका छन्। 

बुधबारको प्रतिनिधिसभा बैठकमा उनले गणतन्त्र दिवसको शुभकामना दिँदै मधेसका एक लाख मुसहरले नागरिकता पाउन नसकेको बताए। 

‘बिडम्बना जनक्रान्तिको जगमा आएको गणतन्त्रमा आज पनि मधेसका करिब एक लाख मुसहरले नागरिकता पाएका छैनन्,’ उनले भने, ‘डोम, चमार, खत्वे, मुसहरलगायत सीमान्तकृत ६६ लाख नेपाली अहिले पनि गरिबी र विभेदको दुष्चक्रमा छन्।’

उनले गएको फागुनको चुनावले व्यवस्था होइन अवस्था बदल्न मत दिएको स्मरण गराए। पहिले निमुखा जनताको अवस्था बदल्न सरकारसँग आग्रह गरे। 

‘पहिले निमुखा, गरिब, पहुँचबिहीन, भूमिहीन, अपांगता भएका महिला, किसान, मजदुरको अवस्था बदल्न सरकारको ध्यानकर्षण गराउँछु,’ उनले भने।