मोबाइल व्यवसायीमा उत्साह नदेखिनु चिन्ताको विषय : भीष्मराज आङ्देम्बे
‘मोबाइल आजको जीवनसँग गासिएको प्रविधि हो। हाम्रो पुस्ताका लागि मात्र होइन, अहिलेको पुस्ता जन्मिँदै प्रविधिसँग जोडिएको छ। विश्वका धेरै मुलुकमा राजनीतिक परिवर्तनसमेत प्रविधिसँग गासिएको पुस्ताले ल्याएको देखिन्छ,’ उनले भने।
काठमाडौं, जेठ १ : नेपाली कांग्रेसका संसदीय दलका नेता भीष्मराज आङ्देम्बेले मोबाइल प्रविधि आधुनिक जीवनको अपरिहार्य हिस्सा बनिसकेको बताएका छन्।
नेपाल मोबाइल व्यवसायी महासंघको पाँचौं वार्षिक साधारण सभा तथा तेस्रो महाधिवेशनलाई सम्बोधन गर्दै उनले वर्तमान पुस्तादेखि आगामी पुस्तासम्म मोबाइल प्रविधिको प्रभाव झन् व्यापक हुँदै जाने उल्लेख गरे।
‘मोबाइल आजको जीवनसँग गासिएको प्रविधि हो। हाम्रो पुस्ताका लागि मात्र होइन, अहिलेको पुस्ता जन्मिँदै प्रविधिसँग जोडिएको छ। विश्वका धेरै मुलुकमा राजनीतिक परिवर्तनसमेत प्रविधिसँग गासिएको पुस्ताले ल्याएको देखिन्छ,’ उनले भने।
उनले आगामी पुस्तामा प्रविधि अझ उन्नत हुने उल्लेख गर्दै मोबाइल अहिले जीवनकै अभिन्न अंगजस्तै बनिसकेको बताए। साथै, मोबाइल व्यवसायसँग आबद्ध व्यवसायीहरूको अनुहारमा अपेक्षित उत्साह नदेखिएको भन्दै चिन्ता व्यक्त गरे।
आङ्देम्बेका अनुसार नेपाल मोबाइल महासंघमा देशभरका ७० जिल्लाका करिब २७ हजार ४ सय व्यवसायी आबद्ध छन्। उनले व्यवसायीहरूमा उत्साहको कमी देखिनु दीर्घकालीन रूपमा चुनौतीपूर्ण हुने बताए।
‘यदि यो क्षेत्रमा आबद्ध व्यवसायीहरूको अनुहारमा उत्साह आउँदैन भने, भविष्यमा यसले कसरी निरन्तर सेवा दिन सक्छ भन्ने ठूलो प्रश्न हो । अन्य क्षेत्रझैं यो व्यवसाय पनि पलायन हुने अवस्था सिर्जना भयो भने त्यसको असर गम्भीर हुन सक्छ,’ उनले भने।
उनले पछिल्लो समय विभिन्न क्षेत्रमा व्यवसाय पलायन हुने क्रम बढिरहेको उल्लेख गर्दै मोबाइल व्यवसायलाई दिगो र व्यवस्थित बनाउन आवश्यक नीति तथा वातावरण निर्माण गर्नुपर्नेमा जोड दिए।
महासंघको महाधिवेशन शनिबार (आज)देखि सुरु भएको हो। महाधिवेशनले भोलि(आइतबार) नयाँ नेतृत्व चयन गर्नेछ । राष्ट्रिय सभा गृह काठमाडौंमा उद्घाटन भएको महाधिवेशनको बन्दसत्र भक्तपुरको कौशलटारस्थित ह्वाइट पार्टी प्यालेसमा हुने आयोजकले जनाएको छ।
