नयाँ वर्षमा बसन्तपुरमा चहलपहल (तस्बिरहरू)

काठमाडौं, वैशाख १ : नव वर्ष २०८३ को अवसरमा काठमाडौंको बसन्तपुर क्षेत्रमा उल्लेखनीय चहलपहल देखिएको छ ।

नयाँ वर्षको पहिलो दिनसँगै पर्यटकीय गन्तव्यका रूपमा परिचित बसन्तपुरमा आन्तरिक तथा बाह्य पर्यटकहरूको बाक्लो उपस्थिति देखिएको हो । जसले क्षेत्रको वातावरणलाई उत्साहपूर्ण र जीवन्त बनाएको छ।

विशेषगरी बसन्तपुर दरबार क्षेत्र आसपास पर्यटकहरूको भीडभाड उल्लेखनीय रूपमा बढेको छ। ऐतिहासिक तथा सांस्कृतिक सम्पदाले भरिपूर्ण यस क्षेत्रमा नयाँ वर्ष मनाउन आउनेहरूको संख्या बढेको देखिन्छ।

स्थानीय बासिन्दादेखि विदेशी पर्यटकसम्मले यहाँको सांस्कृतिक सम्पदा, वास्तुकला र परम्परागत जीवनशैली नजिकबाट अनुभव गर्ने अवसर लिइरहेका छन्।

काल भैरव मन्दिरमा दर्शन गर्नेहरुको उपस्थिति उल्लेखनीय छ भने आसपासका क्षेत्रमा मानिसहरू फोटो तथा भिडियो खिच्न व्यस्त देखिन्छन्।

सामाजिक सञ्जालका लागि स्मरणीय क्षण कैद गर्न युवापुस्ता विशेष सक्रिय देखिएका छन्। विदेशी पर्यटकहरू त्यहाँ प्रदर्शित परम्परा र संस्कृति झल्किने सामग्रीहरूको अवलोकनमा रमाइरहेका छन्।

नयाँ वर्षको अवसर पारेर आयोजना गरिएका विभिन्न सांस्कृतिक कार्यक्रमहरूले बसन्तपुर क्षेत्रलाई अझ आकर्षक बनाएका छन्।