राष्ट्रिय आर्थिक गणना २०८२ सुरु हुँदै, ५ हजार कर्मचारी परिचालन, बैशाख २ देखि देशभर गणक खटिने

काठमाडौं, चैत २५ : राष्ट्रिय तथ्याङ्क कार्यालयका उप–प्रमुख तथ्याङ्क अधिकारी तथा प्रवक्ता ढुण्डीराज लामिछानेले राष्ट्रिय आर्थिक गणना २०८२ सञ्चालनका लागि करिब ५ हजार कर्मचारी परिचालन गरिएको जानकारी दिएका छन्।

नेपाल पत्रकार महासंघको सहकार्यमा आयोजित अन्तरक्रिया कार्यक्रममा बोल्दै उनले बैशाख २ गतेदेखि देशभर गणक खटिने जानकारी दिए।

‘राष्ट्रिय आर्थिक गणना गर्न ५ हजार जना कर्मचारीहरु परिचालन भएका छन् । बैशाख २ गतेबाट देशभर गणकहरु खटिने छन् कामको लागि,’ उनले भने।

उनले आर्थिक गणनाबाट प्राप्त हुने तथ्यांकले देशको अर्थतन्त्र सञ्चालनका लागि आवश्यक नीति तथा योजना निर्माणमा महत्वपूर्ण आधार प्रदान गर्ने बताए।

‘अर्थतन्त्रलाई कसरी चलायमान गर्ने विषयमा सबै सेक्टरको तथ्यांक आइसकेपछि राज्यले बनाउने नीति, योजना, बजार कस्तो छ? बजारमा के आवश्यकता छ? के निर्यात बढी भैइरहेको छ ? के आय भैइरहेको छ ? भन्ने नीति योजना बढाउनको लागि यो आर्थिक गणनाले ठूलो एउटा आधार दिन्छ,’ उनले भने।

लामिछानेले हरेक वर्ष स्याम्पल विधिबाट सर्वेक्षण गरी कुल गाहस्थ उत्पादन (जिडिपी)को तथ्यांक सार्वजनिक गर्दै आएको उल्लेख गर्दै यसपटकको आर्थिक गणनाले त्यसलाई थप सुदृढ आधार दिने बताए।

‘हरेक वर्ष राज्यको अर्थतन्त्रको साइज निकाल्नको लागि स्याम्पल विधिबाट हामीले सर्भे गर्छौं । त्यो सर्भेले ठूलो आधार यसले दिन्छ,’ उनले भने।