३ दिनपछि सञ्चालनमा आयो विपी राजमार्ग

काभ्रे, कात्तिक १५ : विपी राजमार्ग तीन दिनपछि सञ्चालनमा आएको छ। 

काभ्रेको चारसयबेशी र पिप्लेमा पहिरोले सडक अवरुद्ध गरेको स्थानमा डाइभर्सन निर्माण गरेपछि आजबाट राजमार्ग संचालनमा आएको हो।

बिहीबारदेखि परेको अविरल वर्षाले विभिन्न स्थानमा गएको पहिरो र लेदोको कारण तीन दिनदेखि राजमार्ग अवरुद्ध थियो। 

लगातारको वर्षाका कारण बिपी राजमार्ग अन्तरगतको चौकीडाँडा, चारसयबेसीको नाङसाल क्रसर, बोक्सीकुना र माम्तीमा पहिरो खसेर तथा नार्के, पिन्थलीबेशी, विरुवाडाँडा, डालाबेशी लगायतको स्थानमा लेदोको कारण राजमार्ग पूर्णरुपमा अवरुद्ध भएको थियो। 

डाइभर्सन निर्माण भए पनि रोशी खोलाको किनारा र माथिबाट आउने सुक्खा पहिरोको कारण सावधानी अपनाएर यात्रा गर्न प्रशासनले अनुरोध गरेको छ।