सुत्केरीको मृत्युपछि किस्ट अस्पताल तनावग्रस्त, अस्पताल तोडफोड

काठमाडौं, कात्तिक १० : ललितपुरको इमाडोलस्थित किष्ट शिक्षण अस्पतालको अवस्था तनावग्रस्त भएको छ । उपचारको क्रममा सुत्केरीको मृत्यु भएपछि अवस्था तनावग्रस्त भएको हो। 

अस्पताल परिसरमा ढुंगामुडासहित तोडफोड गरिँदा केही व्यक्ति घाइते समेत भएका छन्।

अस्पतालको लापरबाहीले सुत्केरीको मृत्यु भएको भन्दै आफन्तले आज पनि प्रदर्शन गरेपछि अस्पतालमा बाक्लो संख्यामा सुरक्षाकर्मी परिचालन भएका छन्। प्रहरीले अस्पताल घेरेर राखेको छ भने बाहिर ठूलो संख्यामा मृतकका आफन्त र परिवारका सदस्यहरु भेला भएका छन्। 

गत शुक्रबारसुत्केरी गराउने समयमा मीना राईको मृत्यु भएको थियो। अस्पतालको लापरबाहीले गर्भवती महिलाको ज्यान गएको आरोप आफन्तहरुको छ । 

अस्पताल बन्द गर्नुपर्ने, मीनालाई न्याय दिनुपर्ने लगायतका माग राख्दै उनीहरू ढुंगा बोकेर अस्पतालमा आक्रमण गरेपछि प्रहरीलाई भिड नियन्त्रण गर्न समस्या परेको छ।