डोटीमा गाडी दुर्घटना हुँदा एक जनाको मृत्यु, २१ जना घाइते

डोटी, असोज २५ : डोटीमा गाडी दुर्घटना भएको छ। 

अछामबाट धनगढी आइरहेको सुपप्र०१००१ ख ३९५६ नम्बरको गाडी भीमदत्त राजमार्ग अन्तर्गत जोरायल गाउँपालिका–२ मा आज बिहान दुर्घटना भएको हो।

दुर्घटनामा एक जनाको मृत्यु भएको छ भने २१ जना घाइते भएका छन्।

प्रहरीका अनुसार दुर्घटनामा अछामको मंगलसेन नगरपालिका घर भएकी २२ वर्षीया हरिया परियारको घटनास्थलमै मृत्यु भएको छ।

दुर्घटनामा परेर ६ बालबालिकासहित अन्य २१ जना घाइते भएका छन्। उनीहरूमध्ये एक जनाको अवस्था गम्भीर रहेको छ। सबैलाई उपचारका लागि धनगढी ल्याइएको छ ।