‘देश र जनताका आवश्यकताका आधारमा सरकारले काम गरिरहेको छ’

लमजुङ, असार ७: सञ्चार तथा सूचना प्रविधिमन्त्री पृथ्वी सुब्बा गुरुङले देश र जनताका आवश्यकताका आधारमा सरकारले काम गरिरहेको बताएका छन्।

लमजुङ बेँसीसहर नगरपालिका–८ मा आयोजित एमाले जिल्ला कमिटी लमजुङको वार्षिक समीक्षा बैठकमा उनले जनताले वर्तमान सरकारले राम्रो काम गरेको हेर्न चाहेकाले सोही अनुरुप काम गरेर जनताको आशा र विश्वास पूरा गर्ने बताए।

गुनासो नआउने गरी सरकार अघि बढिरहेको उनले बताए। उनले भने, ‘अहिले प्रधानमन्त्री, मन्त्री, मुख्यमन्त्री, पालिका प्रमुखहरुले कस्ता काम गरेका छन् भनेर जनताले मूल्यांकन गरिरहेका छन्।’ 

सरकारले गर्ने कामका आधारमा जनमत बढ्ने र घट्ने भएकाले त्यसतर्फ ध्यान दिनुपर्ने उनले बताए।  

मन्त्री गुरुङले पार्टी बलियो बनाउन पार्टीका नेता तथा कार्यकर्ताले जतिसुकै खटिए पनि जनप्रतिनिधिले राम्रो काम गरेमा मात्र पार्टीप्रति जनता आकर्षित हुने उल्लेख गरे।

‘हामी फेरि २०४८ तिरकै कार्यशैलीमा फर्कनुपर्छ, त्यतिबेलाकै आचरणमा फर्कनुपर्छ। आचरणमा सुधार हुनुपर्छ,’ उनले भने ‘हामी नैतिकवान, इमान्दार, शासकीय सुधारमा क्षमतावान बन्न सकेमा मात्र हाम्रो साथमा जनता हुनेछन्, हामी जनतामाझ हुनेछौं।’