‘माधव नेपाल’ले कसैसँग घुस लियो भनेर भन्नसक्ने मान्छे धर्तीमै छैनन्’
दुई वर्ष प्रधानमन्त्री भएर मुलुक चलाउने मै हो, संकटको बेला देशलाई अगाडि बढाउने मै हो। तर कोही मान्छे छ यो धर्तीमा जन्मेको जसले भनोस माधव नेपालले पैसा घुस कसैसँग लिएको छ। म चुनौतीका साथ भन्न चाहान्छु।’
काठमाडौं, जेठ ३० : नेकपा एकीकृत समाजवादीका अध्यक्ष माधव कुमार नेपालले ‘माधव नेपाल’ले पैसा घुस कसैसँग लिएको भनेर भन्नसक्ने मान्छे धर्तीमै नभएको बताएका छन्।
शुक्रबार काठमाडौंमा आयोजित नेकपा एस सुदूरपश्चिम प्रदेश सम्पर्क कमिटिद्वारा आयोजित कार्यकर्ता भेला कार्यक्रममा उनले खाएको विष लाग्ने हो नखाएको विष लाग्दैँन् भन्दै नेपालले घुस खाएको कुरा पुष्टि गर्न चुनौती दिएका छन्।
‘तपाईंहरू निश्चिन्त रहनुहोस, खाएको विष लाग्ने हो नखाएको विष लाग्दैन। त्यसकारण मैले त चुनौति दिने गरेको छु। मुलुकलाई अगाडि बढाउन सहयोग गर्ने मान्छे हुँ म,’ उनले भने, ‘दुई वर्ष प्रधानमन्त्री भएर मुलुक चलाउने मै हो, संकटको बेला देशलाई अगाडि बढाउने मै हो। तर कोही मान्छे छ यो धर्तीमा जन्मेको जसले भनोस माधव नेपालले पैसा घुस कसैसँग लिएको छ । म चुनौतीका साथ भन्न चाहान्छु।’
घुस खाने, भ्रष्टाचार गर्ने मान्छेसँग जोड्ने कुरा सबैभन्दा चित्त दुख्ने कुरा भएको अध्यक्ष नेपालको भनाइ छ।
उनले नबिराएकाले डराउनुपर्ने कुनै आवश्यकता नभएकाले उच्च मनोबलका साथ अगाडि बढेको बताए। उनले अन्त्यमा सत्यको जित र असत्यको हार निश्चित हुने बताए।
‘एउटा मान्यता बोकेर म अगाडि बढेको छु। नबिराउनु, नडराउनु। बिराएको छैन भने डराउनु पर्ने कुनै आवश्यकता छैन। मान्छेको मनोबल गिराउने, मान्छेलाई तनाबयुक्त बनाउने र मान्छेको व्यक्तित्वलाई सिध्याउनेगरी लागेका छन्,’ अध्यक्ष नेपालले भने, ‘अझ कोही कोही त धेरै खुरापाती हुन्छन्। तर अन्त्यमा सत्यको जित हुन्छ असत्यको हार हुन्छ। न्यायको जित हुन्छ, अन्यायको हार हुन्छ। अन्याय गर्नेहरुको पतन हुन्छ। इतिहास साक्षी छ। यो उच्च मनोबलका साथ अगाडि बढ्नुपर्ने आवश्यकता छ। यसरी नै अगाडि बढ्न पनि आग्रह गर्न चाहान्छु।’
