सिरहामा शिक्षकको कुटाइबाट १३ वर्षीय बालक अस्पताल भर्ना 

सिरहा, वैशाख २६ : गोलबजार नगरपालिका वडा नं. ७ चाहेर्वा  स्थित एपेक्स विद्या मन्दिरमा कक्षा ८ अध्ययनरत १३ वर्षिय छात्र अविनास यादव शिक्षकको कुटाईबाट मुर्छित भएका छन्। 

अविनासको बुबाले विद्यालयबाट बालक छोराको उद्धार गरी गोलबजारस्थित एक निजी अस्पतालमा भर्ना गराएका छन्। बालक अविनासको उपचार भइरहेको छ । उनी खतरामुक्त भएपनि ठिक हुन एक साता लाग्न सक्ने बताइएको छ। 

शिक्षक सन्तोष गुप्ताले आफूलाई कोठा थुनेर बाँसको लठ्ठीले लगातार प्रहार गरेको विद्यार्थी अविनासले बताएका छन्। अविनासको गाला, पिठ्यु र तिघ्रामा गहिरो घाउ चोट र दर्जनौ नील डाम देखिन्छ। 

गृहकार्य नगरेको र भने अनुसार नगरी अटेरी गरेको निहुमा शिक्षक गुप्ताले अविनाशलाई मरनासन्न हुने गरी कुटेको बुबा सुरेशकुमार यादवले बताए। 

‘म खाना खान बसेको थिएँ, अचानक कसैले फोन ग¥यो। तिम्रो छोरालाई पिटेर बेहोस बनाएको छ भनेपछि म गाँस छोडेर कुँदे। विद्यालयमा पुग्दा मेरो छोरा इन्तु न चिन्तु थियो। शिक्षकमाथि कारबाही हुनुपर्छ।’

विद्यार्थीलाई निर्घात कुट्ने शिक्षक सन्तोष गुप्तालाई प्रहरीले पक्राउ गरेको इलाका प्रहरी कार्यालय गोलबजारले जनाएको छ। प्रहरीले कानून बमोजिम कारवाही हुने बताएको छ।