केही समय लागेपनि राजनीतिको नेतृत्व पछिल्लो पुस्ताले नै लिन्छन् : मन्त्री पौडेल
मन्त्री पौडेलले विद्यार्थी आन्दोलनले साझा मुद्दा पहिचान गरेर त्यसको आधारमा अगाडि जाने अवस्था भयो भने राज्यमाथि पनि सकारात्मक हस्तक्षेप गर्न सक्ने बताए।
काठमाडौं, वैशाख २४ : स्वास्थ्य तथा जनसंख्या मन्त्री प्रदिप पौडेलले केही समय लागेपनि राजनीतिको नेतृत्व पछिल्लो पुस्ताले नै लिने बताएका छन्।
बुधबार काठमाडौंमा आयोजित कार्यक्रममा उनले केही समय लागे पनि अन्त्यमा नेतृत्व नयाँ विषय ल्याउनेहरु कै पक्षमा जाने भन्दै राजनीतिको नेतृत्व पछिल्लो पुस्ताले नै लिने बताएका हुन्।
‘यो मुलुकमा धेरै काम गर्नुपर्ने छ, तर गर्न सकिदैँन् भन्दै पलायन हुने होईन गर्न सकिन्छ भनेर अगाडि बढ्नु पर्छ। समस्याको समाधान दिने हिसाबले नेतृत्वमा आउनु, जतिले चाहे पनि राजनीतिको नेतृत्व पछिल्लो पुस्ताले नै लिन्छ,’ उनले भने, ‘केही समय लाग्न सक्छ तर अन्त्यमा नेतृत्व नयाँ विषय ल्याउनेहरु कै पक्षमा जान्छ।’
मन्त्री पौडेलले विद्यार्थी आन्दोलनले साझा मुद्दा पहिचान गरेर त्यसको आधारमा अगाडि जाने अवस्था भयो भने राज्यमाथि पनि सकारात्मक हस्तक्षेप गर्न सक्ने बताए।
‘विद्यार्थीहरुले साझा मुद्धा निर्माण गरेर सँगसँगै जाने वातावरण निर्माण गर्नुपर्छ। नेपालमा २०४७ साल, २०६२, ६३ सालको आन्दोलनमा सधैँ लोकतन्त्रवादी विद्यार्थी संगठनहरु आपसमा मिलेर अगाडि बढेको अवस्था थियो,’ उनले भने, ‘त्यसकारण वर्गीय मुद्धा प्राप्त गर्नका लागि विद्यार्थी संगठनहरु बीच एकता कायम गर्न सक्नु पर्छ। साझा मुद्धा पहिचान गरेर त्यस आधारमा अगाडि जाने अवस्था भयो भने विद्यार्थी आन्दोलनले राज्यमाथि पनि सकारात्मक हस्तक्षेप गर्न सक्छ।’
परम्परागत रुपमा गलत मान्यताका आधारमा विकसित भएका कतिपय कुराहरुलाई अन्यत गर्नका लागि विद्यार्थी आन्दोलनले महत्वपूर्ण भूमिका खेल्ने उनको भनाई छ।
