सरकार सेटिङ र भागबण्डामा निर्णय गर्ने प्रवृत्तिमा रमाइरहेको छ : सांसद वाग्ले

काठमाडौं, वैशाख २३ : राष्ट्रिय स्वतन्त्र पार्टी (रास्वपा) का सांसद डा.स्वर्णिम वाग्लेले गभर्नर नियुक्तिमा सरकारले राजनीतिक सेटिङ गरिरहेको आरोप लगाएका छन्। 

मंगलबार बसेको प्रतिनिधिसभा बैठकमा बोल्दै उनले सरकार सेटिङ र भागबण्डाको आधारमा निर्णय गर्ने प्रवृत्तिमा रमाइरहेको बताए। 

‘सरकार सानो एउटा राष्ट्र बैंकको नियुक्तिमा पनि दुई महिनादेखि अल्झिरहेको छ। माथि सेटिङ गरेर अनि समिति बसाइन्छ, अनि एउटा रबर स्ट्याम्प नियुक्ति हुने होला । त्यसमा पनि गिजोलिने जस्तो देखिन्छ,’ उनले भने, ‘सरकार सेटिङ र भागबण्डाको आधारमा निर्णय गर्ने प्रवृत्तिमा रमाइरहेको छ।’ 

९० को दशकको कुल ग्राहस्थ्य उत्पादनको दर कुशासनकै कारण कमजोर बनेकाले मुलुकको अर्थतन्त्र धरासायी बनेको भन्दै उनले आर्थिक रूपान्तरणका लागि विस्तृत सम्झौता गरेर अघि बढ्नुपर्ने धारणा राखे। 

‘९० को दशकको जिडिपी दर कायम गर्न नसक्नुको कारण कुशासन हो। यदि त्यही दर कायम गर्न सकेको भए मुलुकको अर्थतन्त्र १ सय अर्बको हुन्थ्यो,’ उनले भने, ‘कुशासनको मुल्य जिडिपीले खेपिरहेको छ। बजेटको आकार बढाउनुअघि सुशासनतिर ध्यान दिऔं।’

उनले सरकारले अरु देशको नक्कल गर्दागर्दा नीति तथा कार्यक्रम उँटजस्तो बनेको भन्दै नीति तथा कार्यक्रम सुरुवात गर्ने बेलायतले पछिल्लो नीति तथा कार्यक्रम त्यसकै नक्कल गर्ने नेपालले भने अत्यन्तै लामो दस्तावेज ल्याएको बताए।