राष्ट्रिय सभामा ‘राष्ट्रिय विधि विज्ञान प्रयोगशाला स्थापना र सञ्चालन’ र ‘पानीजहाज सञ्चालन तथा व्यवस्थापन’ विधेयक पेस
काठमाडौं, माघ २४ः राष्ट्रिय सभामा ‘राष्ट्रिय विधि विज्ञान प्रयोगशाला स्थापना र सञ्चालन विधेयक, २०८१’ र ‘पानीजहाज सञ्चालन तथा व्यवस्थापन विधेयक, २०८१’ पेस भएको छ।
राष्ट्रिय सभाको बिहीबारको बैठकमा शिक्षा, विज्ञान तथा प्रविधि मन्त्री विद्या भट्टराईले विधि विज्ञान प्रयोगशाला स्थापना र सञ्चालन विधेयक पेस गरेकी हुन्। यस्तै, भौतिक पूर्वाधार तथा यातायातमन्त्री देवेन्द्र दाहालले पानीजहाज सञ्चालन तथा व्यवस्थापन विधेयक पेस गरे।
शिक्षामन्त्री भट्टराईले राष्ट्रिय सभा बैठकमा विधयकको पेश गर्नेक्रममा वैज्ञानिक विधि र पद्धतिको प्रयोगद्वारा प्रमाणको संकलन, विश्लेषण तथा परीक्षण गरी न्यायिक परीक्षणमा सहयोग पुर्याउन तथा विधि विज्ञानको सम्बन्धमा अनुसन्धान र परीक्षणलाई विशिष्टिकृत बनाउनका लागि राष्ट्रिय विधि विज्ञान प्रयोगशालाको स्थापना र सञ्चालन गर्न आवश्यक रहेको बताएकी थिइन्।
भौतिक पूर्वाधार तथा यातायातमन्त्री देवेन्द्र दाहालले पनि नेपालभित्रकै विभिन्न नदी तथा तालहरुमा विभिन्न क्षमताका जलयानहरु सञ्चालनमा आइरहेको बताउँदै व्यवस्थापन र नियमन गर्ने प्रस्ताव विधेयकमा राखिएको बताए।
