जसले बैंकको सफ्टवेयर बनायो उसैको खाताबाट साढे ३ करोडभन्दा बढी पैसा चोरी

काठमाडौं, पुस १९ : सिटिजन्स बैंकको सफ्टवेयर ह्याक गरी साढे ३ करोड रूपैयाँभन्दा बढी रकम चोरी भएको छ।

बैंकको सफ्टवेयर ह्याक गरी आइटी कम्पनी एफवान सफ्ट इन्टरनेशनल प्रालिको बैंक खाताबाट  पटकपटक गरी ३ करोड ५१ लाख ५० हजार ३७२ रूपैयाँ चोरी भएको हो।

जिल्ला सरकारी वकिल कार्यालय काठमाडौंले सिस्टम ह्याक गरी रकम चोरी प्रकरणमा २४ जनालाई प्रतिवादी बनाएर बिहीबार काठमाडौं जिल्ला अदालतमा मुद्दा दायर गरेसँगै घटना बाहिरिएको हो।

खाताबाट अनधिकृत रूपमा पैसा निकालिएको भन्दै एफवान सफ्टका तर्फबाट धीरजकुमार भुजेलले प्रहरीको साइबर ब्युरोमा विद्युतीय माध्यमसम्बद्ध ठगी कसुरमा जाहेरी दिएका थिए।  

जाहेरीका आधारमा प्रतिवादी बनाइएको २४ मध्ये ९ जना पक्राउ परेका छन्। अन्यलाई फरार सूचिमा राखेर सरकारी वकिल कार्यालयले मुद्दा दायर गरेको हो।

सिटीजन्स बैंकको सफ्टवेयर एफवान सफ्टले नै बनाएको हो। सरकारी वकिल कार्यालयको अभियोगपत्र अनुसार एफवान सफ्टले सिटिजन्स बैंकको सफ्टवेयर बनाएबापतको भुक्तानी लिन दरबारमार्गमा रहेको सिटिजन्स बैंकमा खाता खोलेर कारोबार गर्दै आएको थियो।

त्यसक्रममा अक्टोबर १ देखि ४ तारिखसम्म एफवान सफ्टको उक्त खातामा अनधिकृत प्रवेश गरी गिरोहले साढे ३ करोड रूपैयाँभन्दा बढी पैसा चोरी गरेपछि एफवान सफ्ट मंसिर २६ गते प्रहरीमा पुगेको थियो।

पक्राउ परेका ९ जनामा ललितपुरका ४० वर्षीय त्रिगुण रत्न बज्रचार्य, सिरहा गोलबजारका २० वर्षीय राहुल ठाकुर, १९ वर्षीय पुरूषोत्तम साह, सप्तरी हनुमाननगर कंकालिनीका २१ वर्षीय कृष्णरमण राउत, राजविराजका ३१ वर्षीय सञ्जिवकुमार शर्मा, उदयपुर बेलकाका २० वर्षीय कमल थापामगर, २७ वर्षीय दिपक थापामगर, धरानका २४ वर्षीय सन्देश राई र सुनसरी देवानगन्जका २२ वर्षीय सागरकुमार साह छन्।

मोरङका मनोज श्रेष्ठ, सिरहाका मुकेश मुखिया, सुरजकुमार महतो, उदयपुरकी सुजता थापामगर, भोजपुरकी सरू राई, सिरहाका राकेश कुमार महतो, पर्साकी दिपमाला कुमारी कुशवाहा, बाराका प्रतिक चौधरी, धनकुटाका सलन लिम्बू, मोरङकी सपना कुमारी सिंह, अनु सोराली, सिरहाका अविनाश रौनियार, धनकुटाका दर्शन इङनाम लिम्बू, विवश याखा र ललितपुरका सजन अमात्यलाई फरार सूचिमा राखेर मुद्दा दायर भएको हो।

पक्राउ परेका ९ जनाको बैंक खाता प्रयोग भएको प्रहरी अनुसन्धानमा खुलेको छ। तर आफ्नो खाता ठगीमा प्रयोग भएको भन्ने बारे आफूलाई थाहा नभएको उनीहरूले बयान दिएका छन्।

सिरहाका  राहुल ठाकुर गोलबजार- १० डण्टाटोलमा बुवाको फलाम औजार बनाउने पसलमा काम गर्दै आएका थिए।  तीन महिनाअघि उनलाई गाउँकै साथी पुरूषोत्तम साहले आफूसँग नागरिकता नभएको र बुवाले विदेशबाट पैसा पठाउन लागेको भन्दै बैंक खाता खोलेर दिन आग्रह गरेका थिए।

पटकपटक इन्कार गर्दा नभएपछि साँच्चै अप्ठ्यारो परेको होला भन्ठानेर आफूले गोलबजारमै रहेको नबील बैंकमा खाता खोलेको र उसैले भनेको मोबाइल नम्बर राखेर मोबाइल बैंकिङ सेवा सुरू गरी पुरूषोत्तमलाई दिएको राहुलले बयानमा भनेका छन्।

पछि नबिल बैंकको खातामा समस्या आएको भन्दै पुरूषोत्तमले राहुललाई अरू बैंकमा खाता खोलेर दिन भनेका थिए। पुरूषोत्तम झगडालु स्वभावको रहेकाले आफुले उनले भनेबमोजिम सिद्धार्थ बैंक र कुमारी बैंकमा समेत खाता खोलेर खाता नम्बर र मोबाइल बैंकिङ सेवा उनैलाई दिएको राहुलले बयानमा भनेका छन्।

'त्यसरी खाता खोलेर दिएपछि निजसँग मेरो भेटघाट भएको थिएन। इलाका प्रहरी गोलबजारले मंसिर २६ गते नियन्त्रणमा लिएर अनुसन्धानका लागि साइबर ब्युरोमा उपस्थित गराएपछि मात्रै मैले मेरो खाता दुरूपयोग भएको थाहा पाएँ,' राहुलले बयानमा भनेका छन्।

बयानकै क्रममा पुरूषोत्तम साहले अविनाश रौनियारले सेयर कारोबारका लागि बैंक खाता आवश्यक भएको भनेपछि राहुलको नागरिकताबाट बैंक खाता खोलेर दिएको भनेका छन्।

पछि प्रहरीले नियन्त्रणमा लिएपछि मात्रै दुरूपयोग भएको थाहा पाएको उनले बयानमा भनेका छन्। रौनियार फरार सूचिमा छन्।

पक्राउ परेका अन्यले भने सामाजिक सञ्जालबाट अनलाइन जबको अफर आएको र लिंक खोलेर उनीहरूले भनेबमोजिम गर्दै जाँदा आफ्नो बैंक खाताको विवरण दिएको बयानमा भनेका छन्।

त्रिगुण रत्न बज्राचार्यले तीन महिना अगाडि फेसबुक चलाउने क्रममा  घरमै बसी पैसा कमाउनुहोस् भन्ने विज्ञापन देखेका थिए। त्यसमा क्लिक गर्दा टेलिग्रामको लिंक खुलेको र एक प्रयोगकर्तासँग कुराकानी भएको बयानमा बताएका छन्।

कुराकानीको क्रममा मैले भनेको गर्दै जानु पैसा कमाउने उपाय सिकाउँछु भनेको र केहि अनलाइन टास्क गर्ने र त्यसबापत कारोबारको आधारमा कमिसन पाउने भनेपछि आफू विश्वासमा परेको उनले बयानमा भनेका छन्।

त्यसपछि टेलिग्रामका ती प्रयोगकर्ताले बज्राचार्यसँग उनको बैंक खाताको विवरण मागेका थिए। उनको बैंक खातामा ती प्रयोगकर्ताले ३ लाख रूपैयाँ जम्मा भएको भन्दै स्टेटमेन्टको स्क्रिनसट पठाउन लगायो। बज्राचार्यले सोही बमोजिम गरे।

त्यसपछि उनलाई छुट्टाछुट्टै क्यूआर पठाएर एउटामा ५० हजार, अर्कोमा १ लाख र अर्कोमा १ लाख ३० हजार रकमान्तर गर्न लगाएपछि आफूले सोही बमोजिम गरेको उनले बयानमा भनेका छन्।

'बाँकी बँचेको २० हजार रूपैयाँ चाहीँ तिम्रो स्यालरी हो भनी बताए।  यो कारोबार भएको केही दिनमै मेरो खाता रोक्का भयो र बैंकमा बुझ्दा साइबर ब्युरोबाट रोक्का भएको भनेको जानकारी पाएँ। केही दिनमा साइबर ब्युरोबाट फोन आएपछि पुस २ गते उपस्थित हुँदा प्रहरीले नियन्त्रणमा लिएपछि मात्रै घटनाबारे थाहा पाएँ,' बज्रचार्यले बयानमा भनेका छन्।

पक्राउ परेका अरू प्रतिवादीहरूको हकमा पनि त्यस्तै घटना भएको अभियोगपत्रमा उनीहरूले दिएको बयानमा उल्लेख छ।

एफवान सफ्टको खाताबाट अनधिकृत रूपमा निकालिएको पैसा उनीहरुको खातामा ट्रान्सफर गरेर त्यहाँबाट विदेश लगिएको हुनसक्ने साइबर ब्युरोका एक प्रहरी अधिकारीले बताए।

ह्याक पनि विदेशबाटै भएको प्रहरीले जनाएको छ।

ह्याक गर्ने गिरोहको आइपी एड्रेस बेलायत देखिएको तर अन्य ठाउँबाट ह्याक गरेर आइपी एड्रेस फरक ठाउँको राखेको हुनसक्ने आकलन पनि प्रहरीले गरेको छ।

यसबारेमा थप अनुसन्धान भइरहेको प्रहरीले जनाएको छ।

बैंकको सफ्टवेयर ह्याक गरी करोडौं रूपैयाँ अनधिकृत रूपमा रकमान्तर भएपछि बैंक र त्यसमा रकम जम्मा गर्ने सर्वसाधरणहरूमा चिन्ता प्रकट भएको छ। 

एफवान सफ्टले सिटिजन्स बैंकका मात्रै होइन, अरू विभिन्न बैंक तथा वित्तिय संस्था र डिजिटल वालेट बनाएको छ।

उसले बनाएको सिस्टम ह्याक गरी उसकै करोडौं पैसा चोरी भएपछि उसले सफ्टवेयर बनाएको अन्य बैंकका ग्राहकहरूको बचतको सुरक्षाबारे प्रश्न उठेको छ।