राष्ट्र बैंकद्वारा चार महिनाको आर्थिक तथा वित्तीय स्थिति सार्वजनिक

काठमाडौं, मंसिर २७ : नेपाल राष्ट्र बैंकले विहीबार मुलुकको वर्तमान आर्थिक तथा वित्तीय स्थिति सार्वजनिक गरेको छ। 

चालु आर्थिक वर्षको चार महिनाको तथ्यांकमा आधारित रिपोर्ट सार्वजनिक गरिएको हो । राष्ट्र बैंकका अनुसार वार्षिक बिन्दुगत आधारमा उपभोक्ता मूल्य सूचकाङ्कमा आधारित मुद्रास्फीति ५.६० प्रतिशत रहेको औंल्याइएको छ। 

यस्तै, आयात ०.२ प्रतिशतले र निर्यात ४.२ प्रतिशतले बढेको छ। विप्रेषण आप्रवाह नेपाली रुपैयाँमा ९.१ प्रतिशतले बढेको छ । शोधनान्तर स्थिति रु.२०५ अर्ब ८३ करोडले बचतमा रहेको प्रतिवेदनमा उल्लेख छ।

प्रतिवेदन अनुसार कुल विदेशी विनिमय सञ्चिति अमेरिकी डलरमा १६ अर्ब ७० करोड रहेको छ भने  नेपाल सरकारको खर्च रु.४१५ अर्ब २ करोड र राजस्व परिचालन रु.३२३ अर्ब २४ करोड छ। 

विस्तृत मुद्राप्रदाय ३.० प्रतिशतले बढ्दा वार्षिक बिन्दुगत आधारमा यस्तो मुद्राप्रदाय १२.१ प्रतिशतले बृद्धि भएको छ । बैंक तथा वित्तीय संस्थाको निक्षेप संकलन २.३ प्रतिशतले र निजी क्षेत्रमा प्रवाहित कर्जा २.५ प्रतिशतले बढेको पनि प्रतिवेदनले उल्लेख गरेको छ।