नेपाल समाजवादी पार्टीको नाम र झन्डा फेरियो

काठमाडौं, कात्तिक ६  । बाबुराम भट्टराई नेतृत्वको नेपाल समाजवादी पार्टीले पार्टीको नाम र झन्डा परिवर्तन गरेको छ।

मंगलबार पोखरामा सम्पन्न प्रथम विधान अधिवेशनले पार्टीको नाम र झन्डा परिवर्तन गर्ने निर्णय गरेको हो।

पार्टीको नाममा पछाडि कोस्टकमा नयाँ शक्ति थप्ने निर्णय भएको छ। सो अनुसार पार्टीको नाम छोटकरीमा नेसपा नयाँ शक्ति हुने भनिएको छ।

परिवर्तित नाम र झन्डा विधान प्रतिनिधिहरुबाट सर्वसम्मत रुपमा पारित भएको हो। विधान अधिवेशनबाट आगामी माघ २५, २६ र २७ गते महाधिवेशन गर्ने सचिवालय बैठकको निर्णय पनि पारित गरेको छ।

विधान अधिवेशनले पार्टीको केन्द्रीय समिति सदस्य ९९ जना, ११ सदस्यीय पदाधिकारी हुने व्यवस्था पारित गरेको छ। जसमा १ अध्यक्ष, ५ उपाध्यक्ष (१ महिला, १ जनजाति , १ मधेसी , १ खसाआर्य, १ दलित), १ महासचिव, ३ सचिव, १ कोषाध्यक्ष हुनेछन्।

निर्वाचन समिति ३३ सदस्यीय हुनेछन्। सबै तहमा प्रत्यक्ष निर्वाचन प्रणालीबाट नेतृत्व चयनको व्यवस्था पारित गरिएको छ।

पार्टीमा युवाको नेतृत्व स्थानीय तहमा ४० प्रतिशत, प्रदेशमा ३० र केन्द्रमा २० प्रतिशतको व्यवस्था गरिएको छ। त्यस्तै सबै समितिमा महिलापदाधिकारी ३३ प्रतिशतको व्यवस्था पनि विधानमा गरिएको छ।

विधान अधिवेशनमा पार्टीको आयव्यय प्रस्तुत गरिएको छ। आय ७ लाख ५० हजार र व्यय ९ लाख ७७ हजार १६० रुपैयाँ रहेको छ।