स्वास्थ्यमन्त्री पौडेलको निर्देशन भक्तपुर क्यान्सर अस्पतालमा कार्यान्वयन

काठमाडौं, साउन २१ : भक्तपुर क्यान्सर अस्पतालमा दुई सिफ्टमा ओपिडी र क्युआर प्रणाली सुरु भएको छ। स्वास्थ्यमन्त्री प्रदीप पौडेलको निर्देशनपछि दुई सिफ्टमा सेवा सुरु भएको हो।

अस्पतालले साउनको पहिलो साताबाट टोकन प्रणालीबाट सेवा, अनलाइन अपोइटमेन्ट, शल्यक्रिया कक्ष  बढाएर पाँच बनाएको समेत जानकारी दिएको छ।

अस्पतालमा तीन वटा मात्रै शल्यक्रियाका कक्ष थियो। जसका कारण शल्यक्रियाका लागि १ महिनासम्म कुर्नुपर्ने अवस्था रहेकोमा अब सो अवस्थाको अन्त्य हुने समेत अस्पतालले दाबी गरेको छ।

मन्त्री पौडेलले सेवाग्राहीको चाप र उपलब्ध स्रोत साधनको तारतम्य मिलाई अस्पतालमा दुई सिफ्टमा ओपीडी सेवा सञ्चालन गर्न निर्देशन दिएका थिए।

यस्तै विस्तारित अस्पताल सेवा कार्यक्रम सञ्चालनसम्बन्धी कार्यविधि, २०७७ बमोजिम विस्तारित अस्पताल सेवा लागू गर्न भनेका थिए।

अस्पतालमा सेवाग्राहीको भीड व्यवस्थापनका लागि सेवा काउन्टर थप गर्ने, अनलाइन टिकट काट्ने, अनलाइन समय व्यवस्थापन विद्युतीय भुक्तानी प्रणाली लागू गर्ने, सेवाग्राहीले सामान्य कामको लागि समेत अस्पताल प्रमुखलाई पर्खनुपर्ने बाध्यता हटाउन पनि भनेका थिए ।

मन्त्रीको निर्देशन सबै लागु भइसकेको अस्पतालले जनाएको छ। अस्पतालले  दैनिक ४ सय ५० देखि ६ सय ५० जना बिरामीलाई ओपिडी सेवा दिँदै आएको छ।

दैनिक मेजर ३ माइनर २ सर्जरी गरिँदैं आएकोमा अपरेशन थियटर बढाएर ५ बनाइएसँगै दैनिक ५ वटै मेजर सर्जरी गर्न सकिने अस्पतालले जानकारी दिएको छ।