'प्रसाद २'का निर्देशक सुदर्शन थापा पक्राउ

काठमाडौं, जेठ २१ः चलचित्र निर्देशक सुदर्शन थापा पक्राउ परेका छन्। ‘प्रसाद २’ चलचित्रको विवाद मुद्दामा उनलाई पक्राउ गरिएको प्रहरीले जनाएको छ।

थापालाई बालुवाटारस्थित रोयल अम्पायर होटल परिसरबाट सोमबार दिउँसो मालीगाउँ प्रहरीले पक्राउ गरेको हो। पक्राउपछि उनलाई प्रहरी वृत्त बौद्धमा पठाएको प्रहरीले जनाएको छ।

उनको निर्देशनमा बन्न लागेको चलचित्र ‘रावायण’को दोस्रो चरणको छायांकन सुरु हुने क्रममा थियो। छायांकन सुरू हुनुअघि प्रहरीले उनलाई पक्राउ गरेको हो। निर्देशक पक्राउ परेपछि अहिले फिल्मको छायांकन रोकिएको छ।

आफूहरुको मञ्जुरीबिना फिल्मलाई देश तथा विदेशमा प्रदर्शन गरेर एक करोड ५० रुपैयाँ ठगी गरेको भन्दै चलचित्र ‘प्रसाद २’ का निर्माता सुदर्शन बस्नेत र ज्याक श्रेष्ठले गत साउन १० गते जिल्ला प्रहरी परिसर, काठमाडौंमा ठगी तथा आपराधिक विश्वासघातको जाहेरी दिएका थिए। थापा प्रसाद २ का निर्देशक पनि हुन्।

आजदैखि सुरु हुन लागेको उनी निर्देशित ‘रावायण’को दोस्रो चरणको छायांकनअघि प्रहरीले उनलाई पक्राउ गरेको हो। निर्देशक थापा पक्राउपछि फिल्मको छायांकन रोकिएको छ।