लुम्बिनी र बुद्धलाई विश्वमा चिनाउने अभियान, लण्डनको वुलिचलाई स्वयम्भु जस्तै सिंगारिने  

काठमाडौं, जेठ १९ : २५६८ औं बुद्ध जयन्तीको अवसर पारेर लण्डनमा बुद्ध जयन्ती २०२४ को भव्य तयारी गरिएको छ । लामो समयदेखि बुद्धको देश नेपाल चिनाउने अभियानमा सक्रिय बुद्व फाउन्डेसन युकेको आयोजनामा आगामी जुन २ मा लण्डनको वुलिचमा उक्त कार्यक्रम हुन लागेको हो । 

२०१६ देखि निरन्तर बुद्ध जयन्ती को अवसरमा कार्यक्रम गर्दै आएको फाउन्डेसनले यस बर्ष अझ भव्य कार्यक्रमको आयोजना गरेको फाउन्डेसनका अध्यक्ष दिपक श्रेष्ठले जानकारी दिए ।

लण्डनस्थित नेपाली राजदुतावास र नेपाल पर्यटन बोर्डको सहयोगमा आयोजना गरिएको उक्त कार्यक्रममा बेलायतका दर्जनौ संघ संस्थाले आर्थिक सहयोग गरेका छन् । बुद्ध नेपालमा जन्मेका हैनन् भनेर भ्रम  फैलिएको र लुम्बिनी नेपालमा नभई भारतमा पर्ने भनेर प्रचार गरिएकोले अन्तर्राष्टिय स्तरमा बुद्धको देश भनेर चिनाउनकै लागि कार्यक्रमको आयोजना गरिएको अध्यक्ष श्रेष्ठले बताए । 

लुम्बिनीको मात्र नभई पशुपतिनाथ मन्दिर, जानकी मन्दिर, सगरमाथा, पोखरा र मुस्ताङ सहित देशभरका महत्वपूर्ण पर्यटकीय गन्तब्य जसमा नेपालको गौरव गासिएको छ त्यस्ता पर्यटकीय स्थलको बारेमा जानकारी दिने कार्यक्रमको उद्देश्य रहेको छ । यसका साथै नेपालको संस्कृती झल्कने भेषभुषा, बुद्धका उपदेश, उनका किताबहरु, उनीसँग सम्बन्धित गीत, संगीतको प्रस्तुत गरेर विश्वभर बुद्धका बारेमा जानकारी गराउने आयोजकको भनाइ छ । कार्यक्रममा बालबालिकालाई बुद्व र लुम्बिनीको चित्र बनाउने प्रतिस्पर्धा समेत गराईने छ । 

कार्यक्रमका लागि लण्डको वुलिचलाई काठमाडौंको स्वयम्भुको झल्को आउने गरी सिंगारिने तयारी गरिएको आयोजकले बताएको छ । कार्यक्रममा बिभिन्न देशका राजदुत तथा कुटनितिज्ञलाई आमन्त्रण गरिएको छ ।