शेफिल्ड युनाइटेडविरूद्ध आर्सनलको आधा दर्जन गोल

काठमाडौं, फागुन २२: आर्सनलले प्रिमियर लिगमा शेफिल्ड युनाइटेडलाई ६-० को फराकिलो अन्तरले पराजित गरेको छ ।

शेफिल्डको मैदानमा भएको खेलमा एकपक्षीय जित निकाल्दै प्रिमियर लिगमा आर्सनलले लगातार सातौं खेल जितेको हो ।

अंक तालिकाको अन्तिममा रहेको शेफिल्डविरुद्ध सुरुवाती १५ मिनेटमै ३ गोल गरेको आर्सनलले पहिलो हाफमा कुल ५ गोल गरेको थियो ।

आर्सनलका लागि मार्टिन ओडेगार्डले पाँचौ मिनेटमै पहिलो गोल गरेका थिए । १३औं मिनेटमा बुकायो साकाको प्रहार शेफिल्डका जयडेन बोग्लेको खुट्टामा लागेर डिफ्लेक्ट हुँदै गोल भएपछि आर्सनलले अग्रता दोब्बर बनाउको थियो ।

त्यसपछि ग्याब्रीयल मार्टिनेलीले १५औं, काई हाभार्टजले २५औं र डेक्लन राइसले ३९औं मिनेटमा गोल गरे ।

पहिलो हाफमा गोलको वर्षा गरेको आर्सनलले दोस्रो हाफमा भने एक गोल मात्र थप्यो । ५८औं मिनेटमा बेन ह्वाइटले छैटौं गोल गरे ।

जितपछि आर्सनलले शीर्ष स्थानको लिभरपुल र दोस्रो स्थानको स्थानको म्यानचेष्टर सिटीलाई टक्कर दिँदै उपाधि होडमा आफूलाई कायम राखेको छ ।

आर्सनलको २७ खेलबाट ६१ अंक भएको छ । समान खेलबाट लिभरपुलको ६३ र सिटीको ६२ अंक छ ।

पराजित शेफिल्ड २७ खेलबाट १३ अंकसहित रेलिगेशनको संघारमा छ ।