नेपाल ‘ए’ र क्यानडा ११ को दोस्रो एक दिवसीय खेल आज

काठमाडौं, फागुन ८ : नेपालको ‘ए’ टिमले क्यानडा ११ विरुद्ध आज मंगलबार दोस्रो एक दिवसीय क्रिकेट खेल्दै छ । मूलपानी क्रिकेट मैदानमा विहान साढे ९ बजे खेल सुरु हुने छ । 

तीन खेलको सिरिजमा क्यानडा ११ अगाडि रहेको छ । पहिलो  एक दिवसीयमा नेपाल ‘ए’विरुद्ध क्यानडा ११ ले चार विकेटको जित निकालेको थियो । राष्ट्रिय टिमको बेन्च बलियो बनाउने लक्ष्यका साथ नेपाल क्रिकेट संघ क्यानले पहिलो पटक ‘ए’ टिम बनाएको हो ।

नेपालको सिनियर टिमविरुद्ध तीन खेलको एक दिवसीय सिरिज खेलेको क्यानडाले नेपालको ‘ए’ टिमविरुद्ध क्यानडा ११ को टोली बनाएर तीन खेलकै एक दिवसीय सिरिज खेलेको हो ।

क्यानडा ११ मंगलबार पनि जित निकाल्दै सिरिज आफ्नो पक्षमा पार्ने प्रयासमा हुँदा नेपालको ‘ए’ टिम पनि जित निकाल्दै सिरिजमा कमब्याक गर्ने लक्ष्यमा हुने छ । 

तेस्रो एक दिवसीय भने विहीबार हुने छ । यो सिरिज पछि क्यानडाले फेब्रुअरी २८ तारिखदेखि युएई र स्कटल्याण्डसँग आइसीसी लिग टूको पहिलो त्रिकोणात्मक सिरिज खेल्ने छ ।